Persona të armatosur sulmuan selinë e forcës civile paramilitare në qytetin Peshawar të Pakistanit, duke vrarë të paktën tre oficerë, sipas autoriteteve lokale. Ngjarja ndodhi në orën 08:10 me orën lokale, në një nga zonat më të frekuentuara të qytetit, përcjell DW.
Sipas policisë, dy nga sulmuesit ishin atentatorë vetëvrasës. Njëri shpërtheu veten në hyrje të kompleksit, ndërsa dy të tjerë tentuan të hynin brenda, por u qëlluan për vdekje në parking. Forcat e sigurisë kryen më pas një operacion pastrimi për të kontrolluar nëse në zonë kishte mjete të pashpërthyera.
Autoritetet konfirmuan se tre sulmues dhe tre anëtarë të forcës paramilitare janë vrarë. Pesë persona të plagosur u dërguan në spitalin Lady Reading.
Ende asnjë grup nuk e ka marrë përgjegjësinë për sulmin, por talebanët pakistanezë (TTP) dyshohen për lidhje me ngjarjen, pasi kanë kryer sulme të ngjashme më parë. Ngjarja vjen dy javë pas një sulmi vetëvrasës në një gjykatë në Islamabad, gjithashtu i lidhur me TTP.
Tensionet mes Pakistanit dhe Afganistanit kanë qenë të larta për shkak të aktivitetit të TTP, ndërsa muajin e kaluar dhjetëra persona u vranë në përleshje në kufi, të cilat përfunduan pas një armëpushimi të ndërmjetësuar nga Katari.
