Kryetari i Partisë Demokratike, Sali Berisha, ka akuzuar kryeministrin Edi Rama se ka “kërcënuar me vdekje” gjyqtarin e GJKKO dhe prokurorin e SPAK që po trajtojnë çështjen ndaj ish–zv.kryeministres Belinda Balluku. Deklarata e Berishës erdhi pas fjalës së Ramës, i cili gjatë një aktiviteti publik citoi një deklaratë të ish-prokurorit amerikan Jackson: “Kur prokurori kërkon njeriun përpara krimit, drejtësia vdes; dhe kur një pushtet hyn në territorin e një tjetri, Kushtetuta demokratike nuk merr më frymë, por mbytet.”
Sipas Berishës, ky citim, bërë në të njëjtën ditë kur Balluku paraqitej në GJKKO, përbënte “kërcënim serioz” ndaj trupës gjykuese. Ai e interpretoi deklaratën e Ramës si tentativë për të ushtruar presion në procesin gjyqësor që lidhet me hetimet e SPAK mbi aferën e tunelit të Llogarasë, ku Balluku është nën hetim dhe ndaj saj është vendosur masa e pezullimit nga detyra.
Berisha akuzoi qeverinë se po ndërhyn në drejtësi dhe se, sipas tij, çdo vendimmarrje ndaj ish-zv.kryeministres është marrë “në përputhje me ligjin dhe Kushtetutën”. Ai përsëriti pretendimet se dëmet në buxhet në këtë projekt kapin 90 milionë euro, ndërsa shtoi se hetimet duhet të shtrihen edhe më tej.
Nga ana e tij, kryeministri Rama nuk ka bërë asnjë reagim të drejtpërdrejtë ndaj akuzave të Berishës. Deri më tani, institucionet e drejtësisë nuk kanë dhënë asnjë koment mbi interpretimin e deklaratës së Ramës nga opozita.
Procesi gjyqësor ndaj Belinda Ballukut dhe bashkëpunëtorëve të saj vijon në GJKKO, ndërsa vendimet e radhës pritet të jepen në seancat e ardhshme.
