Gjermania duhet të rrisë me urgjencë kapacitetet e saj për të frenuar si sulmet konvencionale, ashtu edhe ato hibride, paralajmëroi gjenerali i NATO-s Ingo Gerhartz gjatë hapjes së një konference dyditore për sigurinë në Berlin më 18 nëntor. Deklaratat vijnë mes shqetësimeve në rritje për agresionin rus dhe kërcënimet e një niveli më të ulët në të gjithë Evropën, përcjell REL.
Gerhartz tha se sfida kryesore sot është “frenimi në të gjitha format e shtypjes”, duke kërkuar reforma të shpejta në prokurimin ushtarak, zbatim të menjëhershëm të ligjit të ri për shërbimin ushtarak dhe rritje të gatishmërisë mbrojtëse në nivel shoqëror.
Sipas tij, proceset burokratike në Gjermani vonojnë për vite prokurimin ushtarak dhe industria ka vështirësi për të rritur prodhimin e armëve, gjë që e bën vendin të cenueshëm ndaj taktikave hibride të Rusisë. “Gjermania ende nuk ka arritur pjekurinë strategjike që kërkon koha,” tha ai.
Gerhartz nënvizoi gjithashtu nevojën për të diskutuar mbi frenimin në të ashtuquajturën “zonë gri” të sulmeve hibride, të cilat mund të mos jenë të mjaftueshme për të aktivizuar Nenin 5 të NATO-s, që garanton mbrojtje kolektive.
Konferenca në Berlin ka mbledhur mbi 140 folës – politikanë, ekspertë dhe zyrtarë ushtarakë – të cilët diskutojnë rritjen e prodhimit të armëve, teknologjitë e reja dhe përgjigjet e mundshme ndaj kërcënimeve në rritje ndaj NATO-s dhe Bashkimit Evropian.
Ministri gjerman i Mbrojtjes, Boris Pistorius, u bashkua me ministrin suedez të mbrojtjes Pal Jonson, duke nënshkruar një marrëveshje për thellimin e bashkëpunimit ushtarak mes dy vendeve. Pistorius paralajmëroi për rrezikun e shtuar nga Rusia, e cila po përdor metoda hibride si sulme kibernetike, sabotim, spiunazh dhe dezinformim.
Ai theksoi se Deti Baltik po shndërrohet në zonë tensioni, duke përmendur raste të kabllove nënujore të dëmtuara, shkelje të hapësirës ajrore dhe fluturime dronësh, të cilat, sipas tij, shërbejnë si “test” i presidentit rus Vladimir Putin për aftësinë e Evropës për t’u përgjigjur.
