Presidentja e Komisionit Evropian, Ursula von der Leyen, u ka dërguar një letër qeverive të Bashkimit Evropian më 17 nëntor, ku paraqet tre opsione për të siguruar mbështetjen financiare për Ukrainën gjatë dy viteve të ardhshme. Një ndër opsionet është dhënia e një kredie duke përdorur asetet e ngrira ruse, ndërsa Von der Leyen theksoi se kombinimi i të tre zgjidhjeve mbetet i mundur, përcjell REL.
Muajin e kaluar, liderët e BE-së ranë dakord të mbulojnë “nevojat urgjente financiare” të Ukrainës për periudhën 2026–2027, por nuk miratuan një plan specifik për përdorimin e aseteve të ngrira ruse, për shkak të kundërshtimeve të Belgjikës. Të gjitha vendet anëtare, përveç Hungarisë, i kërkuan Komisionit Evropian të paraqesë opsione të qarta për mbështetjen financiare të Kievit.
Në letrën e saj, të cituar nga Reuters, Von der Leyen tha se opsionet e hartuara janë:
Mbështetje financiare nga shtetet anëtare përmes granteve;
Një hua me përgjegjësi të kufizuar, e financuar nga BE-ja përmes huamarrjes në tregjet financiare;
Një hua me përgjegjësi të kufizuar, e mbështetur mbi bilancet e parave të aseteve të ngrira ruse.
Në dokumentin shoqërues, Komisioni nënvizon se opsionet “nuk janë të përjashtueshme” dhe mund të përdoren së bashku ose njëra pas tjetrës, duke marrë parasysh urgjencën dhe kompleksitetin e situatës. Sipas dokumentit, disa prej tyre mund të shërbejnë si zgjidhje të përkohshme deri në miratimin e buxhetit të ri afatgjatë të BE-së, që pritet të hyjë në fuqi në vitin 2028.
Komisioni vlerëson se nevojat financiare të Ukrainës për vitet 2026–2027 arrijnë në 135.7 miliardë euro. Opsioni i përdorimit të aseteve të ngrira ruse mund të mundësonte një hua prej 140 miliardë eurosh, duke mbuluar plotësisht nevojat e Kievit. Nëse zbatohet opsioni i granteve, shtetet anëtare do të duhet të sigurojnë të paktën 90 miliardë euro për dy vitet e ardhshme.
Në letër, Von der Leyen thekson domosdoshmërinë e një vendimmarrjeje të shpejtë:
“Do të jetë kyç të arrihet sa më shpejt një angazhim i qartë, në mënyrë që financimi i nevojshëm për Ukrainën të miratohet në mbledhjen e Këshillit Evropian të dhjetorit.”
Sipas dokumentit, nga totali prej 135.7 miliardë euro, rreth 83.4 miliardë euro do të nevojiten për ushtrinë ukrainase, ndërsa 52.3 miliardë euro për shpenzime të tjera. Kërkesat financiare do të jenë më të larta në vitin 2026, duke arritur në 71.7 miliardë euro, dhe më të ulëta në vitin 2027, me 64 miliardë euro.
