Prokuroria pranë Gjykatës së Shkallës së Parë të Juridiksionit të Përgjithshëm Tiranë ka përfunduar hetimet dhe ka dërguar për gjykim subjektin tregtar “Buzi Store”, i akuzuar për veprën penale “Fshehje e të ardhurave”, kryer në bashkëpunim me ekonomistin e kompanisë.
Hetimet, të zhvilluara gjatë vitit 2024 në kuadër të procedimit penal nr. 8744, zbuluan se kompania kishte shmangur rreth 3.7 milionë euro të ardhura duke i fshehur nga autoritetet tatimore.
Sipas Prokurorisë, hetimi u zhvillua në bashkëpunim me Drejtorinë e Hetimit Tatimor, përmes metodave speciale të hetimit, duke çuar në zbulimin e një skeme të evazionit fiskal të shkallës së gjerë.
Gjatë kontrolleve të ushtruara në tetë adresa të lidhura me subjektin “Buzi Store” dhe me shoqërinë e fiskalizimit, u sekuestruan kompjuterë, telefona, tableta dhe rreth 8 milionë lekë, të pa justifikuara me dokumentacion ligjor.
Hetimet zbuluan gjithashtu se kompania përdorte një sistem kompjuterik të paautorizuar për lëshimin e faturave përmes një platforme online të palicencuar, “store.dyqanimen.com”. Përmes kësaj platforme, lëshoheshin fatura të falsifikuara ose me vlera të ndryshme nga ato reale, duke shmangur fiskalizimin dhe pagesën e detyrimeve tatimore.
Prokuroria ka depozituar tashmë materialet në gjykatë, ndërsa pritet të zhvillohet seanca e parë gjyqësore ndaj përfaqësuesve të “Buzi Store”.
