Ish-kryeministri Sali Berisha ka shprehur pritshmëritë e tij pozitive për qytetarët që, sipas tij, “kanë votuar kundër qeverisë”, duke theksuar se opozita do të vazhdojë misionin e saj për përmbysjen e pushtetit aktual dhe rikthimin e të drejtës së votës së lirë.
Në një deklaratë të publikuar së fundmi, Berisha u shpreh se “platforma e opozitës para zyrave të qeverisë do të jetë platforma më e ndjekur”, pavarësisht përpjekjeve për ta bllokuar në media që, sipas tij, kontrollohen nga qeveria.
Ai kritikoi konferencën e fundit për shtyp të kryeministrit Edi Rama, duke thënë se “asnjë gazetar nuk guxoi ta pyeste për vjedhjen e 90 milionë eurove në tunelin e Llogarasë”, një çështje që sipas tij është dokumentuar nga emisioni investigativ “Plug”.
Berisha akuzoi gjithashtu zyrtarë të lartë të qeverisë, përfshirë zëvendëskryeministren Belinda Balluku, për përfshirje në atë që e cilësoi si “një aferë korruptive dhe kriminale”, ndërsa e përshkroi qeverinë aktuale si “një përshesh mafioz që nuk njeh as ligj, as moral”.
Sipas tij, “rrafshimi i kanionit për të përvetësuar 25 milionë euro është një krim i shumëfishtë që tregon fytyrën e vërtetë të pushtetit aktual”.
Në përfundim, ish-kryeministri bëri thirrje për mobilizim qytetar:
“Qytetarët shqiptarë duhet të vazhdojnë luftën për një qeveri teknike dhe për zgjedhje të lira e të ndershme. Vetëm kështu mund të rikthejmë demokracinë dhe dinjitetin e këtij vendi.”
