Kryetari i Komitetit Gjyqësor të Dhomës së Përfaqësuesve, Jim Jordan, i kërkoi Departamentit të Drejtësisë të martën që të ndjekë penalisht ish-drejtorin e Agjencisë Qendrore të Inteligjencës (CIA), John Brennan, duke e akuzuar se ai gënjeu Kongresin në lidhje me rolin e “Dosjes Steele” në një vlerësim inteligjence të vitit 2017 mbi ndërhyrjen ruse në zgjedhje.
Jordan, një Republikan nga Ohio, tha se dëshmia e Brennan-it para komitetit të tij në një intervistë të vitit 2023 ishte “qëllimisht dhe me dashje e rreme” dhe në kundërshtim me të dhënat e CIA-s dhe gjetjet e Komitetit të Përhershëm të Përzgjedhur të Dhomës për Inteligjencën (HPSCI).
“Dhënia e deklaratave të rreme para Kongresit është një krim që minon integritetin e detyrës kushtetuese të Komitetit për të kryer mbikëqyrje,” shkroi Jordan në një letër drejtuar Prokurores së Përgjithshme Pamela Bondi. Ai i kërkoi Departamentit të Drejtësisë të hetojë nëse Brennan kishte shkelur ligjin, i cili ndalon dhënien me dashje të deklaratave thelbësisht të rreme në hetimet e Kongresit. Shkelja e këtij ligji është një vepër penale e dënueshme deri në pesë vjet burgim dhe gjoba të konsiderueshme.
Brennan, i cili drejtoi CIA-n nga viti 2013 deri në 2017 nën Presidentin Barack Obama, ka qenë një kritik i shpeshtë dhe i zëshëm i ish-presidentit Trump dhe Partisë Republikane. Ai nuk i është përgjigjur publikisht referimit deri të martën pasdite.
Në qendër të referimit është intervista e transkriptuar e Brennan-it më 11 Maj 2023 me Komitetin Gjyqësor, gjatë së cilës ai pohoi se CIA “nuk ishte përfshirë fare” me Dosjen Steele – një koleksion i memorandumeve kërkimore të opozitës të përpiluara nga ish-oficeri i inteligjencës britanike Christopher Steele që pretendonte lidhje midis Donald Trump dhe qeverisë ruse. Gjetjet e saj më pas u diskredituan.
Dokumente të sapodeklasifikuara tregojnë se një oficer i CIA-s ndihmoi në hartimin e një përmbledhjeje të Dosjes Steele për Vlerësimin e Komunitetit të Inteligjencës (ICA), i cili u publikua në janar 2017.
Raporti i ICA-së i prodhuar nga CIA, FBI dhe NSA arriti në përfundimin se Rusia “kishte një preferencë të qartë” për Donald Trump në zgjedhjet e vitit 2016 dhe ndërhyri në ato zgjedhje për ta ndihmuar atë të fitonte – një gjetje që Jordan dhe të tjerët tani argumentojnë se u bazua pjesërisht në inteligjencë me të meta të shumta. Raporti iu prezantua si Presidentit Obama ashtu edhe Presidentit të zgjedhur Trump dhe u bë një dokument kyç në fazat e hershme të hetimit të ndërhyrjes së Rusisë.
Në atë intervistë të vitit 2023, Brennan po ashtu pretendoi: “CIA ishte shumë kundër pasjes së ndonjë referimi ose përfshirjeje të Dosjes Steele në Vlerësimin e Komunitetit të Inteligjencës.”
Letra e Jordan-it thotë se dëshmia e Brennan-it para Komitetit të tij më 11 Maj 2023, “ishte një përpjekje e paturpshme për të dëshmuar me dashje dhe qëllimisht në mënyrë të rreme dhe fiktive për fakte thelbësore.”
Letra e referimit e Jordan-it citon memo të CIA-s dhe raporte të Kongresit që tregojnë se Brennan jo vetëm që mbështeti përfshirjen e dosjes, por gjithashtu anuloi kundërshtimin e brendshëm nga analistët e CIA-s.
Një memorandum i deklasifikuar i CIA-s, i referuar, thotë se Brennan “formalizoi qëndrimin e tij me shkrim, duke deklaruar se ‘përfundimi im është se besoj se informacioni meriton përfshirje në raport’,” pavarësisht kundërshtimeve nga zyrtarë të lartë të CIA-s.
Sipas raportit të HPSCI, kur u përball me të metat në dosje, Brennan u përgjigj, “Po, por a nuk tingëllon e vërtetë?”
Brennan dëshmoi gjithashtu para Komitetit të Inteligjencës të Dhomës në vitin 2017 se Dosja Steele “nuk u përdor në asnjë mënyrë si bazë për vlerësimin e Komunitetit të Inteligjencës.”
Ndërsa ajo dëshmi bie jashtë afatit të parashkrimit për ndjekje penale, Jordan thotë se ajo pasqyron një model të deklaratave mashtruese ndaj Kongresit.
Letra e Jordan-it thekson një raport të HPSCI të vitit 2017 që përshkruan “Shtojcën A” të ICA-së – një seksion i klasifikuar me dy faqe që përmblidhte Dosjen Steele dhe u përpoq të lidhte përmbajtjen e saj me inteligjencën ekzistuese. Raporti gjithashtu thekson se vendimi për të përfshirë dosjen në ICA “u mor bashkërisht nga drejtorët e CIA-s dhe FBI-së,” pikërisht Brennan dhe Drejtori i atëhershëm i FBI-së, James Comey.
Referimi i Republikanit të Ohios pason deklasifikimin e dokumenteve shtesë të inteligjencës nga administrata Trump në korrik 2025. Këto dokumente, shkroi Jordan, zbulojnë se administrata Obama “qëllimisht fabrikoi” pjesë të ICA-së me qëllim që të dëmtonte administratën e ardhshme Trump, një pretendim që mbetet i diskutueshëm politikisht.
Jordan e ka kthyer mbikëqyrjen agresive në një tipar dallues të kryesimit të tij, veçanërisht në hetimet rreth FBI-së, agjencive të inteligjencës dhe origjinës së hetimit Trump-Rusi.
Mbetet për t’u parë nëse Departamenti i Drejtësisë nën Prokuroren e Përgjithshme Bondi do ndjekë akuza kundër Brennan-it. Departamenti i Drejtësisë ende nuk është përgjigjur publikisht ndaj referimit.
VINI RE: Ky material është pronësi intelektuake e Cleveland.com
Përgatiti për Hashtag.al, Klodian Manjani
