Gjermanët që zgjedhin të punojnë përtej moshës së pensionit do jenë në gjendje të fitojnë deri në 2,000 euro në muaj pa taksa, si pjesë e nismës së kancelarit Friedrich Merz për të trajtuar mungesat e fuqisë punëtore dhe për të ringjallur ekonominë më të madhe të Evropës.
Qeveria vlerëson se masa do kushtojë 890 milionë euro në vit nga momenti që hyn në fuqi, më 1 janar, sipas draftit të parë nga Financial Times. I ashtuquajturi plan i pensionit aktiv, një zotim i fushatës së Merz, pritet të miratohet nga koalicioni i tij me Social Demokratët të mërkurën.
Koalicioni i Merz kërkon të zbusë ndikimin e fuqisë punëtore në plakje të Gjermanisë, ndërsa ekonomia përballet me një mungesë të fuqisë punëtore të kualifikuar pas tre vitesh ngecje. Kjo nismë është një ndryshim strukturor i ofruar nga koalicioni, si pjesë e një “vjeshte reformash” më të gjerë të premtuar nga kancelari.
“Tregu i punës gjerman po përballet me sfida strukturore si rezultat i ndryshimit demografik. Baby boomers dalëngadalë do dalin në pension në vitet e ardhshme, ndërsa më pak të rinj po hyjnë në fuqinë punëtore. Kjo çon në një mungesë të punëtorëve të kualifikuar në shumë industri,” shkruan projektligji.
Puna pas daljes në pension lejohet në Gjermani, ashtu si në pjesën më të madhe të Evropës, por Berlini dëshiron ta bëjë atë më tërheqëse me lehtësime tatimore.
Vendet e tjera që nxisin punën pas pensionit përfshijnë Greqinë, me njëfarë suksesi. Që kur Athina lejoi pensionistët punëtorë të ruanin pensionet e tyre të plota dhe t’i nënshtronin të ardhurat e tyre shtesë një norme të reduktuar takse prej 10 për qind, numri i pensionistëve punëtorë shkoi nga 35,000 në 2023 në më shumë se 250,000 që nga shtatori, sipas Ministrisë së Punës.
Gjermania përballet me disa nga sfidat demografike më të thella të Evropës, me 4.8 milionë punëtorë – 9 për qind të fuqisë punëtore – që do dalin në pension deri në vitin 2035, duke ushtruar presion mbi shtetin e saj të mirëqenies dhe ekonominë.
Përveç një force pune në tkurrje, Gjermania ka orët mesatare më të shkurtra të punës se çdo ekonomi e OECD-së, sipas organizatës me qendër në Paris. Ndërkohë, pjesa e punëtorëve me kohë të pjesshme është dyfishuar në 30 për qind të fuqisë punëtore që nga fillimi i viteve 1990, e nxitur kryesisht nga gratë.
Incentiva tatimore do ndihmojë gjithashtu të “ruajë përvojën dhe njohuritë në kompani për më gjatë” dhe do çojë në një “rritje të përgjithshme të shkallës së punësimit dhe të ndihmojë në rritjen ekonomike dhe të ardhura më të larta qeveritare”, thuhet në projektligj.
Punonjësit dhe punëdhënësit do paguajnë kontribute sociale mbi këto paga, duke ofruar një ndihmë për financat e tensionuara të sistemeve shëndetësore dhe të pensioneve të Gjermanisë.
Vlerësimi prej 890 milionë eurosh në mungesë të të ardhurave tatimore në vit duket se është në fundin e ulët të asaj që presin ekonomistët, duke nënkuptuar se qeveria mund të mos parashikojë një numër të madh përfituesish.
Një zëdhënës i Ministrisë së Financave nuk mund të komentonte menjëherë mbi vlerësimet.
Të tjerët vërejnë gjithashtu se qeveria po mban incentivat ekzistuese të vendosura për të inkurajuar punëtorët të dalin në pension qysh në moshën 63 vjeçare. Mosha ligjore e pensionit në Gjermani është 67 vjeç.
Numri i përfituesve nga masat e reja duhet të rritet me kalimin e kohës, tha Holger Schmieding, kryeekonomist i Berenberg Bank, me efekte shtesë pozitive në rritje dhe kontribute sociale “që kompensojnë më shumë se kostot brenda dy deri në tre vjet”.
