Sekretari i Shëndetësisë i SHBA-së, Robert F Kennedy Jr., mund të shënojë një fitore politike për administratën Trump brenda pak muajsh, pasi Administrata e Ushqimit dhe Barnave (FDA) ka angazhuar GSK për të ndihmuar në përshpejtimin e miratimit të një ilaçi për trajtimin e një çrregullimi të lidhur me autizmin.
Lëvizja e pazakontë e FDA-së do t’i lejojë asaj të anashkalojë një përditësim të gjatë të etiketës për llojet gjenerike të ilaçit, leucovorin, ose prova të reja klinike.
Një zëdhënës i GSK-së i tha Reuters se kompania planifikon të përfundojë aplikimin për përdorimin e ri të versionit të markës së leucovorin-it “sa më shpejt të jetë e mundur.”
Pasi prodhuesi britanik i ilaçeve të bëjë atë punë, FDA-së normalisht do i duheshin rreth katër deri në gjashtë muaj, por mund ta përpunojë kërkesën edhe më shpejt, tha Giuseppe Randazzo nga Shoqata për Barnat e Qasshme (Association for Accessible Medicines), një grup lobues i barnave gjenerike.
Procesi i përshpejtuar do t’u japë mjekëve justifikim shtesë për të dhënë mjekimin për mungesën cerebrale të folatit (cerebral folate deficiency), një çrregullim metabolik që mund të çojë në një sërë simptomash neurologjike, duke përfshirë disa të lidhura me autizmin, duke përmbushur kështu premtimin e Kennedy-t ndaj Presidentit Donald Trump dhe lëvizjes “Ta Bëjmë Amerikën Sërish të Shëndetshme” (“Make America Healthy Again”) me të cilën ai është i lidhur, shkruan Reuters.
Një zëdhënës i HHS-së (Departamenti i Shëndetësisë) tha se provat mbështesin qartë aftësinë e leucovorin-it për të trajtuar shkaqet e mungesës cerebrale të folatit dhe për të përmirësuar rezultatet e pacientëve.
