Në Ditën Botërore të Mësuesve, deputetja e Partisë Demokratike, Ina Zhupa, ka ndarë një mesazh mirënjohjeje për të gjithë mësuesit në Shqipëri, duke vlerësuar përkushtimin, durimin dhe idealizmin e tyre, pavarësisht vështirësive të shumta me të cilat përballen.
Zhupa ndalet te një sërë problematikash që, sipas saj, rëndojnë mbi mësuesit sot, përfshirë:
Gjendjen e dobët financiare dhe pagat që nuk përputhen me përgjegjësinë që mbajnë;
Ngarkesën e madhe jashtë orarit, shpesh pa pagesë, si dokumentacioni në SMIP apo përgatitjet administrative;
Kushtet e vështira për mësimdhënie, me klasa të mbingarkuara, infrastrukturë të amortizuar dhe mungesë të mjeteve bazë didaktike;
Mungesën e trajnimeve cilësore falas nga shteti;
Presionin politik dhe ndërhyrjet e padrejta, që sipas saj cënojnë pavarësinë dhe dinjitetin e mësuesit.
“Këto nuk janë thjesht halle të mësuesve, por plagë të sistemit arsimor që ndikojnë në të ardhmen e vendit,” thekson Zhupa në reagimin e saj, duke marrë angazhimin që zëri i mësuesve të dëgjohet më fort në Kuvend.
Ajo përfundon mesazhin e saj duke theksuar se respekti për mësuesin është themel i çdo shoqërie të zhvilluar, dhe se pa mësues të vlerësuar, nuk ka arsim cilësor, e rrjedhimisht as të ardhme për vendin.
