Ish-presidenti francez, Nicolas Sarkozy, u dënua të enjten me pesë vjet burg për komplot kriminal, lidhur me përpjekjet për të mbledhur fonde për fushatën e tij nga Libia.
Ky vendim shënon rënien më të madhe për konservatorin që udhëhoqi Francën nga viti 2007 deri më 2012.
Dënimi, më i ashpër nga sa pritej, e bëri Sarkozin presidentin e parë francez pas Luftës së Dytë Botërore që përfundon në burg. Vendimi habiti si aleatët ashtu edhe kundërshtarët e tij.
Duke dalë nga salla e gjyqit, Sarkozy i prekur dhe i zemëruar e quajti vendimin “skandaloz”.
“Nëse ata duan që unë të fle në burg, do të fle, por me kokën lart.
Nuk do të kërkoj falje për diçka që nuk e kam bërë”, tha ai, duke theksuar pafajësinë. Ai shtoi se ky vendim është një goditje për besimin tek drejtësia. Në krah të tij ishte bashkëshortja, Carla Bruni, shkruan Reuters.
Gjykata e Parisit e shpalli fajtor vetëm për akuzën e komplotit kriminal, ndërsa e liroi nga akuzat për korrupsion dhe financim të paligjshëm të fushatës.
“U tronditëm, sepse menduam se pafajësia do të njihej”, tha avokati i tij, Jean-Michel Darrois, duke shtuar se shpreson që apeli të ndryshojë vendimin.
Sipas gjykatës, dënimi hyn në fuqi menjëherë. Sarkozy ka pak kohë për të rregulluar punët e tij përpara se të dërgohet në burg, çka pritet të ndodhë brenda një muaji. Mediat franceze raportojnë se më 13 tetor ai do të thirret për t’u njoftuar mbi datën e futjes në qeli.
Ende nuk është bërë e ditur se ku do të vuajë dënimin, por burime gjyqësore sugjerojnë se mund të jetë burgu i famshëm La Santé në Paris, ku dikur janë mbajtur Carlos “Çakalli” dhe ish-diktatori panamez Manuel Noriega.
