Autoritetet libaneze raportojnë se një sulm me dron ka goditur lagjen al-Asira në zonën e Baalbekut, ku të paktën dy persona kanë humbur jetën. Raportimet janë kontradiktore mbi objektivin e sulmit, i cili mund të ketë qenë një automjet, një motor apo edhe një ndërtesë dhe dyqan në zonë, përcjell YNetNews.
Sipas Ministrisë së Shëndetësisë së Libanit, dy personat e vrarë ndodheshin në automjetin e sulmuar. Nga ana tjetër, televizioni saudit Al-Hadath ka raportuar se viktimat janë komandantë të Hezbollahut, edhe pse kjo nuk është konfirmuar zyrtarisht.
Ngjarja ka shtuar frikën për përshkallëzim të mëtejshëm të tensioneve në Liban.
Sulmet me dron në territorin libanez janë intensifikuar muajt e fundit, kryesisht në zonat që konsiderohen bastione të Hezbollahut, duke rritur pasigurinë dhe frikën e një përshkallëzimi më të gjerë në rajon. Baalbeku, një zonë e njohur për praninë e fortë të grupit, është goditur disa herë më parë, çka shihet si pjesë e përpjekjeve për të goditur strukturat dhe drejtuesit e tij.
