Presidenti Donald Trump është zotuar të ndjekë penalisht jo vetëm vrasësin e aktivistit konservator Charlie Kirk, por edhe ata që ai akuzoi për financimin dhe nxitjen e dhunës politike të “së majtës radikale” në SHBA.
Në një deklaratë video të postuar të mërkurën në mbrëmje në Truth Social, Trump e përshkroi Kirk-un, 31 vjeç, si një “patriot” dhe një “martir për të vërtetën dhe lirinë”, duke e lavdëruar atë për frymëzimin e të rinjve amerikanë përmes debateve në kampuset universitare në gjithë vendin.
“Charlie ishte më i miri i Amerikës dhe përbindëshi që e sulmoi, po sulmon gjithë vendin tonë”, tha Trump.
“Një vrasës u përpoq ta heshtte me një plumb, por dështoi, sepse së bashku do sigurohemi që zëri, mesazhi dhe trashëgimia e tij të jetojnë për brezat që do vijnë.”
Presidenti e lidhi vrasjen e Kirk me retorikën e përdorur nga e majta, duke paralajmëruar se “dhuna dhe vrasja janë pasoja tragjike e demonizimit të atyre me të cilët nuk pajtohesh ditë pas dite, vit pas viti”.
“Për vite me radhë, ata në të majtën radikale i kanë krahasuar amerikanët e mrekullueshëm si Charlie me nazistët dhe vrasësit dhe kriminelët më të këqij masivë në botë. Kjo lloj retorike është drejtpërdrejt përgjegjëse për terrorizmin që po shohim në vendin tonë sot. Dhe duhet të ndalet menjëherë”, deklaroi Trump.
Ai premtoi të përdorë të gjithë peshën e administratës së tij për të hetuar jo vetëm autorët, por edhe “organizatat që e financojnë dhe e mbështesin atë, si dhe ata që përndjekin gjyqtarët tanë, zyrtarët e zbatimit të ligjit dhe të gjithë të tjerët që mbajnë rendin në vendin tonë”.
Trump përmendi incidente të tjera që ai ia atribuoi ekstremizmit të krahut të majtë, duke përfshirë atentatin e vitit 2024 kundër tij në Butler të Pensilvanisë, vrasjen e udhëheqësit të shumicës në Dhomën e Përfaqësuesve, Steve Scalise, në vitin 2017, sulmet ndaj agjentëve të ICE dhe vrasjen e fundit të një ekzekutivi të kujdesit shëndetësor në Nju Jork, shkruan RT.
“Ky është një çast i errët për Amerikën”, tha Trump, duke nxitur unitetin rreth “vlerave amerikane për të cilat jetoi dhe vdiq Charlie Kirk – vlerat e lirisë së fjalës, qytetarisë, sundimit të ligjit dhe përkushtimit patriotik dhe dashurisë për Zotin”.
