Peter Mandelson u shkarkua nga detyra e ambasadorit të Britanisë në Shtetet e Bashkuara të enjten, pasi lidhjet e tij me abuzuesin e dënuar për krime seksuale, Jeffrey Epstein, u kthyen në një problem të padëshiruar për kryeministrin britanik Keir Starmer.
Mandelson ishte përballur me presion në rritje pas publikimit nga ligjvënësit amerikanë të një “libri ditëlindjeje” të përgatitur për 50-vjetorin e Epstein në vitin 2003, ku veterani i Partisë Laburiste kishte lënë një shënim me dorë duke e quajtur Epstein “shokun tim më të mirë”.
Pavarësisht zbulimit, Starmer e mbrojti me forcë ambasadorin e tij të mërkurën, duke i thënë parlamentit se Mandelson kishte “besimin e plotë” të tij, shkruan CNN.
Orë më vonë, skandali u përhap me shpejtësi pasi Bloomberg publikoi një mori emailesh midis Mandelson dhe Epstein, në të cilat Mandelson shprehu mbështetje për mikun e tij dhe ofroi të diskutonte çështjen e tij famëkeqe të Floridës në vitin 2008 me kontaktet e tij politike.
Epstein u deklarua fajtor për dy akuza shtetërore për prostitucion dhe kreu 13 muaj burg pas një marrëveshjeje kontroverse për pranimin e fajësisë. Por emailet e marra nga Bloomberg treguan se Mandelson vazhdoi ta mbështeste Epsteinin edhe pas atij dënimi.
“Mendoj se bota jonë dhe jotja ndihemi të pashpresë dhe të tërbuar për atë që ka ndodhur”, shkroi Mandelson.
