Udhëheqja ushtarake e Greqisë po përgatit plane gjithëpërfshirëse operacionale për të mbrojtur rifillimin e projektit të kabllit të ndërlidhjes elektrike Greqi-Qipro këtë vjeshtë, pas tensioneve të vitit të kaluar që ndaluan përkohësisht punën.
Burime ushtarake i thonë Kathimerini-t se janë zhvilluar plane operacionale për çdo lloj sfide, duke përfshirë vendosjen e një numri të konsiderueshëm njësish mbi dhe nën sipërfaqen e detit. Përgatitjet mbështeten në mësimet e nxjerra nga incidenti i Kassos i vitit të kaluar, kur fregatat turke ngacmuan anijet kërkimore që punonin në projektin e Ndërlidhjes së Detit të Madh.
“Forcat e Armatosura të Greqisë janë të gatshme t’i përgjigjen çdo skenari, duke ndërmarrë çdo mision operacional kur dhe ku të caktohet”, thanë burime ushtarake, shkruan Kathimerini.
Marina Helene mban mbikëqyrje të vazhdueshme nga Qiproja lindore deri në Libi, ndërsa mbikëqyrja ajrorr vijon me avionë pa pilot të tipit Heron. Anija kërkimore që pritet të rifillojë studimet – me shumë mundësi NG Worker – do lundrojë nën shoqërim diskret nga anijet luftarake greke.
Greqia mban përgjithmonë katër njësi sipërfaqësore në rajon: një fregatë me forcën UNIFIL të OKB-së pranë Libanit, një fregatë dhe një anije mbështetëse në jug të Kretës, dhe një fregatë pranë Bengazit me Operacionin Evropian Irini. Anije të vogla, duke përfshirë anije me raketa dhe anije luftarake, janë të pozicionuara në Egjeun lindor.
Skenari i mundshëm përfshin përpjekjen e Turqisë për të penguar kërkimin duke vendosur anije luftarake, siç ndodhi shkurtin e kaluar kur një fregatë turke ngacmoi anijet kërkimore nëpërmjet radios, duke çuar në një pezullim të përkohshëm të punës.
Meqenëse rruga e mbetur e kabllit shtrihet në ujërat ndërkombëtare ku Turqia pretendon juridiksion, Athina po peshon të gjitha mundësitë. Megjithatë, nëse Turqia mban një anije në një “largësi të sigurt” gjatë transmetimit të mesazheve radio, përgjigja e Greqisë do jetë e matur.
Athina ka sqaruar se projekti i kabllit është evropian dhe nuk mund të pengohet sipas ligjit ndërkombëtar.
