Në sfondin e njërit prej debateve më përçarëse të Izraelit, dhjetëra burra ultraortodoksë hebrenj u paraqitën të hënën në mëngjes në qendrën e grumbullimit “Tel Hashomer” të IDF-së, ku morën uniforma dhe filluan rrugëtimin e tyre ushtarak në njësi të përshtatura për rekrutët Haredi, shkruan Ynet.
Rekrutët u caktuan në batalione duke përfshirë “Netzah Yehuda”, “Hashmonaim” dhe të tjerë. Për shumë, dita ishte emocionale, por e ndjeshme. Disa kundërshtuan të japain intervista ose foto, duke u thënë gazetarëve në hyrje: “Është e ndjeshme për ne, ju lutemi mos filmoni.”
Yehoyada Cohen, i cili u rekrutua në brigadën e këmbësorisë “Hashmonaim”, e shpjegoi vendimin e tij: “Është koha jonë. Ushtarët dhanë gjithçka që kishin dhe tani është radha jonë. Shpresoj që ushtria do të na lejojë të mbrojmë Izraelin duke ruajtur njëkohësisht mënyrën tonë të jetesës Haredi.”
Babai i tij, Davidi, e mbështeti: “Ata që studiojnë Torah duhet ta bëjnë këtë. Por nëse dikush e ka përfunduar atë rrugë, duhet të marrë pjesë edhe në këtë mitzvah. Është mirë që ushtria krijoi korniza që u lejojnë Haredive të shërbejnë duke ruajtur respektin fetar. Si prindër, duam të besojmë se bijtë tanë do mbrohen në një kornizë që premton të respektojë stilin e tyre të jetesës.”
David, 19 vjeç, i diplomuar në akademinë paraushtarake “Haredi Nitzotz Ba’emuna”, iu bashkua batalionit të këmbësorisë “Netzah Yehuda”.
“Gjatë dy viteve të fundit, nuk kam studiuar më në yeshiva dhe ndjeva se ishte koha të kontribuoja. Jam i emocionuar që do jem ushtar dhe do jap nga vetja për popullin e Izraelit”, tha ai.
Prindërit shprehën emocione të përziera. Një baba pranoi: “Ushtria dhe feja nuk shkojnë gjithmonë bashkë. Nuk është e thjeshtë, nuk është e lehtë. Por sot, ka disa korniza që e bëjnë të mundur. Gjëja më e rëndësishme është mbështetja nga shtëpia. Ky ishte vendimi i tij dhe ne e mbështesim. Zoti i ruajttë.”
Daniel Yekuel, një tjetër rekrut në batalionin “Hashmonaim”, shoqërohej nga prindërit e tij, të cilët thanë: “Nuk e dinim nëse kjo do ndodhte apo jo. Por ishte dëshira e tij dhe ne e pranuam. Edhe kreu i yeshivës së tij dha miratimin e tij. Shpresojmë që Zoti t’i mbrojë të gjithë ushtarët, veçanërisht gjatë kohës së luftës.”
Për Michal-in, djali i dytë i së cilës u rekrutua në “Netzah Yehuda”, momenti ishte thellësisht prekës: “Jemi shumë krenarë. Unë besoj në mënyrën e kombinimit të Torah, punës dhe shërbimit ndaj shtetit. Nuk duam të qëndrojmë mënjanë – duam të jemi pjesë e popullit tonë dhe fitores së tyre.”
Organizata “Shomer Israel”, e cila mbështet strukturat e Forcave të Armatosura të Izraelit Haredi, tha në një deklaratë: “Jemi krenarë për çdo rekrut që zgjedh të kombinojë respektimin e Torah me kontributin në sigurinë e Izraelit. Ata vërtetojnë se dikush mund të jetë si Haredi ashtu edhe ushtar luftarak.”
Zyrtarët ushtarakë konfirmuan më herët të hënën se IDF-ja hoqi dorë nga një plan për të krijuar një zyrë të dedikuar rekrutimi për Hareditë, nga frika se do bëhej një magnet për demonstratat.
