Qeveria greke do prezantojë një pakete ndihme dhe mbështetjeje prej 1.5 miliardë eurosh javën e ardhshme në Panairin Ndërkombëtar të Selanikut, ku sipas traditës, çdo kryeministër në detyrë shpall politikat e qeverisë për vitin e ardhshëm.
Masat do përqendrohen në uljen e taksave për klasën e mesme, lehtësim për familjet me fëmijë, mbështetje për pensionistët dhe personelin me uniformë si dhe ndërhyrje për të adresuar sfidat e strehimit në vend, shkruan Kathimerini.
Një përparësi kryesore e qeverisë është të kanalizojë të ardhurat shtesë të sjella nga rritja ekonomike dhe lufta kundër evazionit fiskal në lehtësimin e barrës mbi të ardhurat e mesme dhe të ulëta, duke mbështetur gjithashtu grupet e prekshme.
Të dhënat e fundit të buxhetit konfirmojnë paraqitjen e fortë të ekonomisë, me një suficit primar prej 7.9 miliardë eurosh për shtatë muajt e parë të vitit 2025, më shumë se dyfishi i objektivit, dhe të ardhura tatimore që tejkalojnë pritshmëritë me 2.1 miliardë euro.
Masat tatimore pritet të përqendrohen në të ardhurat midis 20,000 dhe 40,000 eurosh, duke ofruar gjithashtu lehtësim për ata që kanë të ardhura më të ulëta.
Familjet me fëmijë do shohin pragjet e tyre të pataksueshme të rriten në varësi të madhësisë së familjes.
Parashikohen gjithashtu rishikime të metodës së supozuar të taksimit për të vetëpunësuarit, së bashku me heqjen e “diferencës personale” për 600,000 pensionistë që dolën në pension para vitit 2016, duke siguruar që ata të marrin rritje vjetore.
Personeli me uniformë do përfitojë nga mbështetja e të ardhurave që do çojë në paga më të larta.
Përveç kësaj, pezullimi i TVSH-së për pronat e ndërtuara rishtazi do zgjatet me një vit tjetër, deri në fund të vitit 2026.
