Shtëpia e Bardhë do zhvillojë një diskutim të nivelit të lartë të mërkurën mbi planet e pasluftës për Gazën, ndërsa dy ministra të lartë izraelitë vizitojnë Uashingtonin mes presionit në rritje të SHBA-së për një përfundim të shpejtë të luftës gati dyvjeçare.
Ministri i Jashtëm Gideon Sa’ar ishte planifikuar të takohej me Sekretarin e Shtetit Marco Rubio, ndërsa ministri i Çështjeve Strategjike Ron Dermer ishte gjithashtu në Uashington për bisedime.
Zyrtarët amerikanë në javët e fundit kanë sinjalizuar vazhdimisht dëshirën e administratës Trump për të parë luftën të përfundojë shpejt. Si presidenti Donald Trump ashtu edhe i dërguari i tij i posaçëm, Steve Witkoff, kanë sugjeruar që afati kohor për operacionet e vazhdueshme ushtarake duhet të jetë i shkurtër, edhe nëse Izraeli vazhdon me planin e tij të miratuar për të pushtuar qytetin e Gazës.
Sipas Axios, Trump mblodhi atë që Witkoff e përshkroi si një “takim të madh” që përfshinte dhëndrin dhe këshilltarin e tij Jared Kushner dhe ish-kryeministrin britanik Tony Blair. Një zyrtar i lartë amerikan i tha medias se Trump është bërë gjithnjë e më i frustruar me luftimet e zgjatura.
“Nuk mund ta shikoj më këtë. Është një gjë e tmerrshme”, thuhet se u tha Trump bashkëpunëtorëve.
Javën e kaluar, Kryeministri Benjamin Netanyahu njoftoi se Izraeli do të rihynte në negociata për t’i dhënë fund luftës dhe për të siguruar lirimin e të gjithë pengjeve “nën kushte të pranueshme për Izraelin”. Megjithatë, një delegacion izraelit ende nuk është dërguar në Doha ose Kajro.
Publikisht, Netanyahu ka këmbëngulur se Izraeli do ndjekë vetëm një marrëveshje gjithëpërfshirëse, ndërsa Hamasi ka sinjalizuar gatishmërinë për të pranuar një kornizë të propozuar nga Witkoff – të paktën sipas vetë Witkoff. Pas muajsh gjatë të cilëve Izraeli ushtroi presion për pikërisht atë kornizë, zyrtarët kanë ndryshuar kurs, shkruan Ynet.
Të martën, Trump parashikoi një “përfundim” të luftës brenda dy deri në tre javësh. Witkoff, megjithatë, ofroi një afat kohor të ndryshëm në një intervistë televizive, duke thënë se priste një rezolutë “para fundit të vitit”.
Ndërkohë, IDF po përgatitet për atë që e quan një “marrje në kontroll” të qytetit të Gazës, ndërsa Hamasi ka nisur një fushatë duke i nxitur civilët të qëndrojnë në vend, duke u thënë atyre të largohen “vetëm për në parajsë”.
Witkoff tha se Hamasi kishte rënë dakord me propozimin e fundit, por vetëm pas vonesave të qëllimshme, të cilat ai argumentoi se ishin fajtore për dështimin e bisedimeve. Sipas marrëveshjes, 10 pengje do liroheshin të gjallë dhe trupat e 18 të tjerëve do të ktheheshin gjatë një armëpushimi 60-ditor, me negociatat për marrëveshjen më të gjerë që Netanyahu tani kërkon të vazhdojnë në atë periudhë.
Marrëveshja e propozuar përfshin gjithashtu garancitë e SHBA-së se Izraeli nuk do rifillojë luftimet në ditën e 61-të. Megjithatë, Netanyahu ka sinjalizuar mbështetje për vazhdimin e negociatave ndërsa operacionet ushtarake vazhdojnë, duke e lënë marrëveshjen në një bllokim.
