Mbi 350 persona janë arrestuar në qendër të Londrës gjatë demonstratës më të madhe që lidhet me organizatën Palestine Action që prej ndalimit të saj si organizatë terroriste, përcjell Guardian.
Policia Metropolitane tha se kishte mobilizuar oficerë edhe nga forca të tjera për të siguruar një prani të konsiderueshme në kryeqytet para këtij eventi, i cili pritej të mblidhte një numër të madh protestuesish.
Derisa demonstrata filloi në Sheshin e Parlamentit me rreth 500-600 persona, organizatorët thanë se ishin rreth 1,000 njerëz me pankarta që mbështesnin kauzën. Në orën 18:00, policia raportoi për 365 arrestime.
Një përfaqësues i grupit “Defend Our Juries” deklaroi se pjesëmarrja masive tregon revoltën e njerëzve ndaj përfshirjes së vazhdueshme të qeverisë britanike në atë që ata e quajnë “gjenocid i transmetuar drejtpërdrejt” dhe mbrojten e lirive të vjetra të vendit.
Gjatë protestës pati momente paqësore dhe të qeta, me protestues që mbanin pankarta me mbishkrime si “Unë kundërshtoj gjenocidin, mbështes Palestine Action”. Disa protestues, përfshirë edhe të moshuar, u arrestuan ndërsa kërkonin që qeveria të mos jetë pjesë e dhunës.
Policia kontrolloi edhe bagazhet e arrestuarve, ku u gjetën artikuj të thjeshtë si bukë dhe ujë.
Mes protestuesve ishte edhe Robert Del Naja nga grupi muzikor Massive Attack, i cili kritikoi trajtimin e qytetarëve të thjeshtë si terroristë dhe shprehu shqetësim për gjendjen e lirive civile në Britaninë e Madhe.
Në javët e fundit, tre persona u akuzuan zyrtarisht për mbështetje të Palestine Action, e cila u ndalua në qershor pasi anëtarët e saj dëmtuan avionë ushtarakë në RAF Brize Norton. Mbështetja ose anëtarësia në këtë grup ndëshkohet me deri në 14 vite burg sipas Ligjit Antiterrorizëm 2000.
Në anën tjetër, qeveria britanike njoftoi se do të dërgojë ndihma shtesë prej 8.5 milionë paundësh për Gaza-n nëpërmjet një agjencie të OKB-së, një ditë pasi lideri i opozitës Keir Starmer kritikoi planet e Izraelit për zgjerimin e ofensivës.
