Një komitet ministrash në Itali ka miratuar zyrtarisht ndërtimin e një ure 3.3 kilometra të gjatë që do të lidhë ishullin e Sicilisë me pjesën kontinentale të Italisë përmes ngushticës së Mesinës. Projekti ambicioz, i diskutuar prej dekadash, parashikohet të përfundojë deri në vitin 2032.
Nëse ndërtohet, Ura e Ngushticës së Mesinës do të thyejë rekordin e Urës Çanakkale 1915 në Turqi, aktualisht më e gjata në botë me gjatësi 2.02 kilometra.
Qeveria e kryeministres Giorgia Meloni e ka cilësuar këtë projekt të financuar nga shteti si një investim strategjik për zhvillimin ekonomik të jugut të varfër të vendit. “Nuk është një detyrë e lehtë, por është një investim për të tashmen dhe të ardhmen e Italisë,” deklaroi Meloni.
Ministri i Transportit, Matteo Salvini, e përshkroi urën si “projekti më i madh infrastrukturor në Perëndim”, dhe tha se punimet mund të fillojnë që në shtator apo tetor të këtij viti.
Një projekt i debatueshëm
Megjithatë, projekti nuk është pa polemika. Kritikët vënë në dyshim ndërtimin e një ure të tillë në një zonë të rrezikuar nga tërmetet, duke ngritur shqetësime për koston e lartë, ndikimin në mjedis dhe mundësinë që mafia të përfshihet në tenderët e ndërtimit.
Grupet ambientaliste kanë paraqitur ankesë në Bashkimin Evropian për rreziqet që ndërtimi i urës mund t’i sjellë biodiversitetit dhe mjedisit lokal.
Deputeti Nicola Fratoianni e quajti projektin një “mega-projekt që do të zhysë burime të mëdha publike” dhe që “rrezikon të shndërrohet në një vrimë të zezë gjigante.”
Partia Demokratike e qendrës së majtë e kritikoi gjithashtu projektin, duke e akuzuar për shkelje të normave mjedisore dhe të sigurisë.
Çfarë përfshin projekti?
Me një kosto të parashikuar prej 13.5 miliardë eurosh, ura do të ketë dy linja hekurudhore në mes dhe tre korsi rrugore në secilën anë, duke reduktuar ndjeshëm kohën e udhëtimit midis Sicilisë dhe Kalabrisë, e cila aktualisht varet nga tragetet me pritje të gjata.
Ministri Salvini përmendi gjithashtu përdorimin e mundshëm të urës për qëllime ushtarake dhe sigurie, duke e cilësuar si një projekt me përdorim të dyfishtë.
Pavarësisht skepticizmit të një pjese të madhe të publikut, miratimi i qeverisë këtë javë përfaqëson fazën më të avancuar që ka arritur ndonjëherë projekti në historinë e tij shumëdekadëshe.
