Valët e para të cunamit kanë goditur Hawaiin, ndërsa autoritetet në këtë shtet dhe në pjesë të tjera të rajonit të Paqësorit po përgatiten për valë që mund të arrijnë deri në 3 metra mbi nivelin normal të detit. Disa vende tashmë kanë nisur të ndiejnë ndikimet e para të këtij cunami pas një tërmeti të fuqishëm.
Në Rusi, tërmeti goditi bregun lindor, duke shkaktuar dëme në disa ndërtesa, përfshirë një kopsht fëmijësh që u shemb, megjithatë nuk ka raportime për të lënduar. Pas tërmetit, valët e cunamit mbërritën shpejt në distriktin Severo-Kurilsk, në pjesën jugore të Gadishullit Kamchatka. Ky distrikt ka shpallur gjendjen e jashtëzakonshme. Pamjet filmike tregojnë ujin që vërshon mes ndërtesave, duke dëmtuar infrastrukturën dhe duke marrë me vete mbeturina të mëdha.
Në Japoni, valët e cunamit kanë goditur shumë zona të bregdetit lindor, që nga ishulli verior i Hokkaidos deri në pjesë të ndryshme të ishullit kryesor Honshu, përfshirë edhe zonat pranë Tokios. Deri tani, valët kanë qenë më të ulëta se parashikimet fillestare, rreth 60 centimetra, ndonëse pritej të arrinin deri në 3 metra. Më shumë se 1.9 milionë njerëz në 21 prefektura janë nën urdhër për evakuim. Pamjet tregojnë qytetarë në Hokkaido të strehuar në çatitë e ndërtesave për t’u mbrojtur nga uji.
Në vende të tjera të rajonit të Paqësorit, janë dhënë paralajmërime për cunami edhe në Filipine, Indonezi, Kili, Peru, Ekuador, Meksikë, Panama dhe Tajvan. Autoritetet po ndjekin nga afër zhvillimet dhe po marrin masa për të mbrojtur popullsinë./CNN
