Udhëheqësit e Tajlandës dhe Kamboxhias do të takohen në Malajzi të hënën në një përpjekje për të negociuar një fund të përleshjeve vdekjeprurëse kufitare katër ditore , konfirmuan zyrtarët të dielën.
Bisedimet midis kryeministrit në detyrë të Tajlandës, Phumtham Wechayachai, dhe kryeministrit kamboxhian Hun Manet në Kuala Lumpur do të ndërmjetësohen nga kryeministri malajzian Anwar Ibrahim në cilësinë e tij si kryetar i Shoqatës së Kombeve të Azisë Juglindore (ASEAN) .
“Ata më kanë kërkuar të përpiqem të negocioj një zgjidhje paqeje”, tha Anwar të dielën. “Po diskutoj parametrat, kushtet, por ajo që është e rëndësishme është një armëpushim i menjëhershëm.”
Një zëdhënës i qeverisë tajlandeze konfirmoi pjesëmarrjen e Phumtham në bisedime me qëllim “të diskutuar përpjekjet për paqe në rajon”.
Hun Manet i Kamboxhias tha më herët të dielën se vendi i tij kishte rënë dakord të ndiqte një “armëpushim të menjëhershëm dhe pa kushte”.
Të paktën 34 persona janë vrarë dhe rreth 200,000 të tjerë janë zhvendosur në luftimet midis dy fqinjëve të Azisë Juglindore për tempujt kufitarë të kontestuar këtë javë, me shkëmbime artilerie që vazhduan të dielën.
Trump bën thirrje për bisedime paqeje, kërcënon me tarifa
Presidenti i SHBA-së, Donald Trump, mori përsipër meritat për bisedimet e planifikuara të paqes, duke thënë të dielën përpara një takimi me Presidenten e Komisionit Evropian, Ursula von der Leyen, në Turnbery të Skocisë :
“Fola me të dy kryeministrat dhe mendoj se, kur zbrita unë, mendoj se ata duan të bien dakord tani.”
Më parë, Trump kishte kërcënuar se do të vendoste tarifa ndaj të dy vendeve nëse ato nuk do të ndalonin luftën dhe nuk do të bien dakord për marrëveshje tregtare.
“Pasi folëm me të dyja palët, armëpushimi, paqja dhe prosperiteti duket se janë të natyrshme”, shkroi ai në mediat sociale të shtunën pasi foli me të dy krerët e qeverive . “Ne … nuk duam të bëjmë asnjë marrëveshje, me asnjërin vend, nëse ata janë duke luftuar. Po përpiqem ta thjeshtoj një situatë komplekse!”/DW
