Forcat e Mbrojtjes së Izraelit (IDF) kanë ndaluar 12 shtetas izraelitë, të dyshuar për përfshirje në djegien e gjashtë banesave palestineze në zonën e Betlehemit, raportoi Army Radio të shtunën.
Sipas Jerusalem Post, zjarret shkaktuan vetëm dëme materiale, pa të lënduar apo viktima.
“Natën e kaluar u mor një njoftim për struktura palestineze të djegura në fshatin Kisan, në Bregun Perëndimor. Menjëherë pas njoftimit, forcat e IDF-së u nisën drejt vendngjarjes dhe ndaluan disa persona që ndodheshin pranë vatrave të zjarrit,” thuhet në deklaratën e zëdhënësit të IDF-së, të cituar nga KAN.
Të ndaluarit janë dorëzuar më pas në polici për hetime të mëtejshme. Ngjarja vjen në një klimë në rritje tensioni në Bregun Perëndimor, ku përplasjet mes kolonëve izraelitë dhe palestinezëve janë intensifikuar muajt e fundit.
