Gjermania nuk është më destinacioni numër një për azilkërkuesit në BE pasi fundi i regjimit të Asadit çoi në një rënie të sirianëve që aplikojnë për aazil në bllok, konfirmon një raport.
Sistemi i azilit i BE-së po kalon një “ndryshim të rëndësishëm” pas rënies së ish-presidentit të Sirisë, Bashar al-Assad, nga pushteti në dhjetor, sipas një raporti të pabotuar nga Agjencia e BE-së për Azilin, të parë nga Financial Times.
Agjencia me seli në Maltë regjistroi 64,000 kërkesa për azil në BE në maj – periudha më e fundit e disponueshme – duke shënuar një rënie prej gati një të katërtës krahasuar me të njëjtin muaj në vitin 2024. Në Gjermani, një destinacion popullor për aplikantët sirianë, kërkesat e përgjithshme për azil në maj ranë me rreth gjysmën në 9,900, nga 18,700 të paraqitura të njëjtin muaj të vitit të kaluar, shkruan FT.
Spanja tani është vendi me numrin më të lartë të kërkesave për azil, sipas raportit, me pothuajse 12,800 të regjistruara në maj, nga 16,300 vitin e kaluar. Ndërsa numri i përgjithshëm ka rënë, ka pasur një rritje të aplikimeve në Spanjë nga njerëz që largohen nga Venezuela dhe “kriza e rëndë ekonomike dhe politike” në vend, tha EUAA.
Gjatë dekadës së kaluar, sirianët kishin qenë grupi më i madh i azilkërkuesve në BE, plus Norvegjia dhe Zvicra, “por në fillim të vitit 2025 ky trend u përmbys me aplikimet siriane që ranë ndjeshëm”, thotë raporti.
“Që nga shkurti, Gjermania nuk ka qenë më destinacioni kryesor i BE-s; Spanja, Italia dhe Franca morën të gjitha më shumë aplikime në maj 2025″, shkruan agjencia.
Italia tani merr numrin e dytë më të lartë të aplikimeve, me 12,300 kërkesa në maj, nga 15,500 vitin e kaluar, një e treta e të cilave u paraqitën nga bangladeshas dhe peruanë. Në vendin e tretë është Franca me 11,900 kërkesa, pak më poshtë se 12,500 të vitit të kaluar, të cilat u nxitën nga aplikimet e kongolezëve që iknin nga konflikti në vendin e tyre të origjinës, si dhe afganëve dhe haitianëve.
Raporti vjen ndërsa një numër në rritje i vendeve evropiane po kërkojnë masa më të ashpra për të frenuar emigracionin e parregullt në kontinent, me disa vende, të tilla si Danimarka, që kërkojnë mënyra për të dëbuar emigrantët që vijnë nga vende të sigurta. Më parë këtë muaj, Komisioneri i Emigracionit i BE-së, Magnus Brunner, udhëhoqi një mision në Libi pas një rritjeje të numrit të mbërritjeve nëpërmjet vendit politikisht të paqëndrueshëm, veçanërisht në Greqi. Megjithatë, udhëtimi, për t’u kërkuar autoriteteve libiane të ndalonin largimet, u desh të ndërpritej pasi iu kërkua të largohej.
Pavarësisht ndryshimeve në shpërndarjen e aplikimeve të reja, Gjermania ndoshta mbetet vendi me popullsinë më të madhe të azilkërkuesve, pasi ka pranuar shumë më tepër kërkesa sesa vendet e tjera në vitet e fundit.
Gjermania u ka dhënë azil 150,000 aplikantëve midis viteve 2008 dhe 2024, krahasuar me rreth 50,900 në Spanjë, 40,000 në Itali dhe 65,200 në Francë, sipas Eurostat.
