Një helikopter ushtarak i Ugandës i vendosur në misionin paqeruajtës të Bashkimit Afrikan në Somali u rrëzua në aeroportin e Mogadishut të mërkurën, duke vrarë pesë pasagjerët, tha një zëdhënës i ushtrisë ugandase.
Tre të tjerë nga tetë personat në helikopter i mbijetuan incidentit, por me lëndime dhe djegie të rënda, tha zëdhënësi, Felix Kulayigye.
Impakti i përplasjes kishte shkaktuar shpërthimin e municioneve në bord, duke shkatërruar strukturat aty pranë dhe duke plagosur tre civilë, tha ai, shkruan Reuters.
Misioni i Mbështetjes dhe Stabilizimit të Bashkimit Afrikan në Somali (AUSSOM) tha në një deklaratë më parë se “operacionet e kërkim-shpëtimit janë duke u zhvilluar aktualisht për të rikuperuar ekuipazhin dhe pasagjerët e mbetur”.
Helikopteri u rrëzua në aeroportin ndërkombëtar të Mogadishut pak para se të ulej, tha AUSSOM. Më herët të mërkurën, agjencia shtetërore e lajmeve SONNA e Somalisë raportoi se helikopteri u përfshi nga flakët pas rrëzimit.
AUSSOM ka më shumë se 11,000 personel në Somali për të ndihmuar ushtrinë e vendit të përballet me grupin militant al Shabaab. Grupi i lidhur me al Kaedën ka luftuar për gati dy dekada për të rrëzuar qeverinë e njohur ndërkombëtarisht të Somalisë dhe për të vendosur sundimin e vet.
