Presidenti i SHBA-së Donald Trump tha të martën se synon të jetë “shumë i vendosur” me kryeministrin izraelit Benjamin Netanyahu në lidhje me përfundimin e luftës në Gaza, duke sinjalizuar një presion të ri të SHBA-së përpara një takimi të nivelit të lartë në Uashington javën e ardhshme.
“Netanyahu dëshiron t’i japë fund luftës”, u tha Trump gazetarëve.
“Mendoj se do kemi një marrëveshje javën e ardhshme”.
Ai vlerësoi sulmin e fundit ushtarak të Izraelit ndaj Iranit, duke e quajtur atë “shkatërrim total” dhe tha se takimi i ardhshëm me Netanyahun do të jetë “një festim shumë i shpejtë” i arritjeve ushtarake izraelite, shkruan Ynet.
Netanyahu pritet të niset për në Uashington të shtunën vonë ose të dielën, disa ditë pasi publikisht i dha përparësi kthimit të pengjeve izraelite që mbahen ende në Gaza mbi objektivat e tjera të luftës. Zyra e kryeministrit tha se ai do të takohet me Trump në Shtëpinë e Bardhë dhe do zhvillojë bisedime të ndara me zyrtarë të lartë amerikanë.
Ndërsa ende nuk është arritur një marrëveshje për pengjet, zyrtarët e njohur me bisedimet thonë se është bërë përparim. Si Hamasi ashtu edhe Izraeli duken gjithnjë e më të hapur për negociata, edhe në mungesë të një marrëveshjeje zyrtare armëpushimi. Boshllëqet midis palëve mbeten të konsiderueshme, por negociatorët besojnë se është hapur një “dritare mundësie” – një që zyrtarët izraelitë shpresojnë ta përdorin ndërsa momentumi diplomatik ndërtohet rreth vizitës së Netanyahut.
