Japonia ka ekzekutuar një burrë të quajtur “vrasësi i Twitter-it”, i cili u dënua për vrasjen dhe copëtimin e nëntë personave, kryesisht gra, në përdorimin e parë të dënimit me vdekje në vend në gati tre vjet.
Takahiro Shiraishi, 34 vjeç, u var të premten në burgun e Tokios. Ai u dënua me vdekje në vitin 2020 pasi u deklarua fajtor për vrasjen e nëntë personave – tetë gra dhe një burrë.
Shiraishi u arrestua në tetor 2017 pasi policia kontrolloi shtëpinë e tij në qytetin Zama në prefekturën Kanagawa, në periferi të Tokios, për të hetuar zhdukjen e një gruaje 23-vjeçare që kishte shprehur mendime vetëvrasëse në mediat sociale, përfshirë Twitter-in, i njohur tani si X.
Tre kuti frigoriferike dhe pesë kontejnerë u gjetën në dhomën e Shiraishit, që përmbanin koka dhe kocka njerëzore me mish të kalbur, raportoi në atë kohë televizioni Asahi.
Rasti i vrasjeve masive të profilit të lartë kishte mbërthyer kombin për vite me radhë dhe kishte ngritur shqetësime në lidhje me përdorimin e mediave sociale.
Nëntë viktimat ishin të moshës midis 15 dhe 26 vjeç, sipas transmetuesit publik japonez NHK dhe TV Asahi, të cilët cituan procedurat gjyqësore. Viktimat kishin postuar në internet se donin të vrisnin veten dhe më pas u kontaktuan nga Shiraishi përmes platformave të mediave sociale, raportuan NHK dhe TV Asahi.
Duke përdorur një emërtim që përkthehet lirshëm si “xhelat”, Shiraishi i ftoi ato në apartamentin e tij në Zama, duke premtuar se do t’i ndihmonte të vdisnin, raportoi agjencia e lajmeve Jiji, duke cituar aktakuzën.
Shiraishi u deklarua fajtor për vrasjen e viktimave, duke thënë në gjykatë se i kishte vrarë ato për të kënaqur dëshirat e tij seksuale, raportuan NHK dhe TV Asahi, shkruan CNN.
Ai u shpall fajtor në dhjetor 2020 për vrasjen, përdhunimin dhe copëtimin e nëntë viktimave dhe ruajtjen e trupave të tyre në apartamentin e tij.
Avokati i Shiraishit e apeloi vendimin në Gjykatën e Lartë të Tokios, por më vonë e tërhoqi apelin dhe dënimi u përmbyll, raportoi NHK.
“Ky rast, i nxitur nga motive egoiste si kënaqësia seksuale dhe financiare, çoi në vdekjen e nëntë njerëzve gjatë dy muajve – një ngjarje thellësisht e rëndë që ka shkaktuar tronditje dhe ankth në të gjithë shoqërinë. E kuptoj që është një rast veçanërisht zemërthyes si për viktimat ashtu edhe për familjet e tyre”, u tha gazetarëve të premten në një konferencë për shtyp ministri i Drejtësisë Keisuke Suzuki.
Pas lajmit për ekzekutimin, babai i njërës prej viktimave të Shiraishit i tha NHK-së se do parapëlqente ta kishte parë atë “duke u penduar mbi krimet që kreu, sesa thjesht ta humbiste jetën përmes dënimit me vdekje”.
Ekzekutimi i Shiraishit është i pari që vendi ka parë që nga korriku i vitit 2022, raportoi NHK.
Në Japoni, dënimi me vdekje jepet me varje, me datat e ekzekutimit që nuk bëhen publike deri pas ekzekutimit të dënimit. Ekzekutimet mbahen të fshehta me pak ose aspak paralajmërim, dhe familjet dhe avokatët zakonisht njoftohen vetëm pasi të ketë ndodhur ekzekutimi.
