Kryeministri izraelit Netanyahu ka mbajtur fjalimin e fitores në televizionin publik.
Ai i bëri jehonë operacionit 12 ditor të luftës me Iranin, i cili sipas tij arriti të eliminojë dy rreziqe ekzistenciale për Izraelin, programin bërthamor të Iranit dhe kërcënimin e 20 mijë raketave balistike. Kryeministri izraelit theksoi se operacioni ishte tejet i suksesshëm dhe do hyjë në historinë e luftërave të Izraelit po edhe atyre në botë.
“Të dashur qytetarë të Izraelit, në 12 ditët e Operacionit “Am KeLavi”, arritëm një fitore historike – një fitore që do të mbahet mend për breza. Eliminuam dy kërcënime të menjëhershme ekzistenciale: kërcënimin e asgjësimit bërthamor dhe kërcënimin e 20,000 raketave balistike. Sikur të mos kishim vepruar tani, shteti i Izraelit së shpejti do përballej me shkatërrim. Por kjo nuk ndodhi. Në çastin kritik, u ngritëm si luani, qëndruam të vendosur si luani dhe ulërima jonë tronditi Teheranin dhe jehoi në të gjithë botën. Goditja e papritur e Operacionit “Am KeLavi” do hyjë në analet e luftërave të Izraelit dhe do studiohet nga ushtritë në gjithë botën. Me një goditje të shpejtë, eliminuam komandën më të lartë të Iranit, përfshirë tre Shefa të Shtabit dhe shumë zyrtarë të lartë. Në të njëjtën kohë, ne eliminuam edhe shkencëtarët kryesorë bërthamorë të Iranit – ata që zotëronin njohuritë, udhëhoqën projektin bërthamor dhe synonin të na sillnin vdekje dhe shkatërrim. Ne shkatërruam objektin kryesor të pasurimit në Natanz, uzinën e konvertimit të uraniumit në Isfahan dhe uzinën e ujit të rëndë në Arak.” – tha Netanyahu.
Më tej ai falënderoi presidenti amerikan Trump që iu bashkua Izraelit në sulmet ndaj Iranit në objektin bërthamor të Fordoë ndërsa përsëriti se Teherani nuk do ketë kurrë armë bërthamore.
“Miku ynë, presidenti Trump, na u bashkua në një mënyrë të paprecedentë. Nën drejtimin e tij, ushtria amerikane shkatërroi vendin nëntokësor të pasurimit në Fordoë. Ne goditëm dhjetëra vende të tjera bërthamore iraniane, duke përfshirë laboratorë centrifuge dhe uzina prodhimi. Shtatë vjet më parë, në një operacion të shkëlqyer të Mossadit, ne sollëm thelbin e arkivit sekret bërthamor të Iranit në Izrael. Ne ia ekspozuam programin e tyre të armëve bërthamore Presidentit Trump, botës dhe juve – popullit të Izraelit. Tani, me këtë operacion, ne e përfunduam misionin duke goditur të gjithë arkivin, i cili përmbante të gjithë njohuritë e Iranit për armët bërthamore. Edhe atë e shkatërruam. Për dekada të tëra, ju premtova se Irani nuk do merrte armë bërthamore. Përmes operacioneve tona të shpejta dhe precize, ne e shtypëm projektin bërthamor të Iranit. Dhe nëse dikush në Iran përpiqet ta rindërtojë atë, ne do të veprojmë me të njëjtën forcë dhe vendosmëri për ta ndaluar atë. E përsëris: Irani nuk do ketë armë bërthamore.” – shtoi Netanyahu.
Ai foli më tej pëër goditjen e industrisë së raketave balistike të Iranit duke nënvizuar se ato nuk janë më kërcënim për Izraelin.
“Me të njëjtën vendosmëri, ne shkatërruam industrinë e raketave të Iranit. Ne shkatërruam dhjetëra objekte prodhimi raketash, dëmtuam rëndë rezervat e tyre të raketave dhe shkatërruam shumicën e lëshuesve të tyre – shpesh minuta para se ato të mund të qëllonin mbi Izraelin. Qëllimi keqdashës i Iranit për të kërcënuar Izraelin me dhjetëra mijëra raketa balistike – ky kërcënim është hequr gjithashtu. Sa i përket regjimit, ne e goditëm atë fort. Ne eliminuam figura më të larta, shkatërruam qendrat e komandës, goditëm bazat e IRGC-së dhe simbolet qeveritare. Dhe sot në agim, vetëm disa orë para armëpushimit, ne dhamë sulmin më shkatërrues që regjimi ka njohur ndonjëherë – goditja më e rëndë që Teherani ka parë në pesëdhjetë vjet – duke eliminuar qindra operativë të regjimit në një sulm dërrmues.” – shtoi Netanyahu.
Në fund kryeministri izraelit falënderoi presidentin amerikan Trump dhe administratën e tij për mbrojtjen nga kërcënimi iranian duke theksuar se Izraeli nuk ka pasur kurrë më parë një mik më të madh se Trump në Shtëpinë e Bardhë.
“Qytetarë të Izraelit, në emrin tuaj, falënderoj mikun tim presidentin Trump dhe Shtetet e Bashkuara për rolin e tyre në mbrojtjen e Izraelit dhe eliminimin e kërcënimit bërthamor iranian.
Përfshirja e Amerikës, jo vetëm në mbrojtje, por edhe në sulm, është historike. Nuk ka ndodhur kurrë më parë. Ky është rezultat i përpjekjeve diplomatike që udhëhoqa me ministrin Dermer në bashkërendim të ngushtë me presidentin Trump dhe ekipin e tij. Mund t’ju them, Izraeli nuk ka pasur kurrë një mik më të madh në Shtëpinë e Bardhë sesa Presidenti Trump. E falënderoj thellësisht për partneritetin tonë. Kjo ka implikime të mëdha për sigurinë kombëtare të Izraelit, për sigurinë tuaj dhe të ardhmen e fëmijëve dhe nipërve tuaj, dhe për të gjithë Lindjen e Mesme. Qytetarë të Izraelit, më 7 tetor, ne qëndruam në buzë të një humnere. Ne pësuam katastrofën më të keqe në historinë e Izraelit.
Por falë forcës së kombinuar të qeverisë, forcave të sigurisë dhe jush – popullit – ne u rikuperuam dhe luftuam. Njëzet muaj më vonë, ne ishim në qiellin mbi Iranin, duke i dhënë një goditje që ai kurrë nuk e kishte imagjinuar se do të duhej ta paguante.”
