Ushtria e Koresë së Jugut ka mbyllur sistemin e altoparlantëve përgjatë kufirit me Korenë e Veriut, të cilët transmetonin mesazhe propagandistike anti-veriore. Kjo masë shihet si hapi i parë konkret nga qeveria e re liberale për të ulur tensionet mes dy vendeve, që prej dekadash ndodhen në një marrëdhënie të tensionuar.
Transmetimet përmes altoparlantëve ishin rifilluar në qershor të vitit të kaluar, si përgjigje ndaj fushatës së Koresë së Veriut, e cila kishte dërguar balona të mbushura me mbeturina përtej kufirit. Ky veprim nga Veriu u cilësua si një formë lufte psikologjike ndaj Jugut.
Sipas Ministrisë së Mbrojtjes së Koresë së Jugut, mbyllja e altoparlantëve është pjesë e përpjekjeve për të “rivendosur besimin në marrëdhëniet ndërkoreane dhe për të promovuar paqen në Gadishullin Korean”.
Nga muaji maj deri në nëntor të vitit të kaluar, Koreja e Veriut hodhi mbi territorin jugor mijëra balona që përmbanin materiale të ndryshme si letra mbeturinash, rroba të përdorura, bishta cigaresh dhe pleh organik. Veriu e justifikoi fushatën duke thënë se ishte një kundërpërgjigje ndaj aktivistëve jugkoreanë, të cilët kishin dërguar balona me fletëpalosje propagandistike, USB me këngë dhe seriale televizive nga Koreja e Jugut – materiale që janë të ndaluara në mënyrë të rreptë në Korenë e Veriut./AP
