Një tërmet i fuqishëm ka tronditur ishullin e Rodosit dhe pjesë të Turqisë mëngjesin e sotëm, duke shkaktuar panik mes banorëve dhe turistëve.
Rreth orës 00:30, një tërmet me magnitudë 6.2 të shkallës Rihter goditi 26 kilometra larg ishullit Rodos në Greqi. Lëkundjet u ndjenë në disa vende të rajonit, përfshirë Turqinë, Egjiptin, Sirinë dhe Greqinë. Kompania turistike TUI ka lëshuar një paralajmërim për pushuesit në Greqi, duke u kërkuar të qëndrojnë të qetë, pasi shumë prej tyre kanë rrëfyer në rrjetet sociale se janë zgjuar nga dridhjet e forta.
Rreth dy orë më vonë, në orën 02:17, një tjetër tërmet me magnitudë 5.8 goditi qytetin bregdetar të Marmarisit në Turqinë fqinje. Mediat turke raportojnë se të paktën 69 persona janë plagosur, shumica prej tyre pasi janë hedhur nga ndërtesat në përpjekje për të shpëtuar. Fatkeqësisht, është konfirmuar edhe humbja e jetës së një vajze 14-vjeçare.
Autoritetet në të dy vendet po ndjekin nga afër situatën, ndërsa banorët janë të ftuar të ndjekin udhëzimet e emergjencës dhe të qëndrojnë në vende të sigurta.
Ndërsa lëkundjet goditën zonat pranë bregdetit në orët e para të mëngjesit, autoritetet nuk kanë lëshuar asnjë paralajmërim për cunami.
As Observatori Kombëtar i Athinës (NOA), as Observatori Kandilli dhe Instituti i Kërkimeve Sizmologjike në Turqi (KOERI) nuk kanë dhënë njoftime për rrezik cunami deri në këto momente. Autoritetet vijojnë monitorimin e situatës, ndërsa qytetarët këshillohen të qëndrojnë të informuar dhe të ndjekin udhëzimet zyrtare./Mirror
