Qytetarët e Koresë së Jugut votuan më 3 qershor në zgjedhjet presidenciale të parakohshme, të cilat u zhvilluan pas muajsh trazirash politike që pasuan shpalljen e gjendjes ushtarake nga presidenti i atëhershëm Yoon Suk Yeol. Akti i Yoon në dhjetor 2024 shkaktoi protesta të gjera dhe krizë institucionale, duke çuar në shkarkimin e tij nga Gjykata Kushtetuese në prill 2025.
Fituesi i zgjedhjeve është kandidati liberal Lee Jae-myung, një ish-avokat për të drejtat e njeriut dhe lider i opozitës, i cili mori rreth 51.7% të votave, sipas sondazheve të daljes nga qendrat e votimit. Rivali i tij konservator, Kim Moon-soo, përfaqësues i Partisë Popullore të Pushtetit, arriti të siguronte 39.3% të votave. Pjesëmarrja në votime arriti në 79.38%, shifra më e lartë që nga viti 1997.
Në fjalimin e tij pas fitores, Lee e cilësoi këtë votim si një “ditë gjykimi” për vendimin e Yoon për të shpallur gjendjen ushtarake dhe për paaftësinë e partisë konservatore për t’u distancuar prej tij. Ai premtoi një qeverisje gjithëpërfshirëse dhe reformuese, me fokus në drejtësinë sociale, ndihmë për familjet e klasës së mesme dhe të ulët, si dhe forcimin e rolit të Koresë së Jugut në diplomacinë ndërkombëtare.
Kandidati Kim Moon-soo, pranoi humbjen dhe e uroi Lee për fitoren, duke bërë thirrje për bashkim kombëtar. Pranimi i menjëhershëm i rezultatit nga kampi konservator u përshëndet si një shenjë e pjekurisë demokratike të vendit.
Zgjedhjet e parakohshme ndikuan edhe në sektorin privat, ku kompani të mëdha si Coupang dhe CJ Logistics ndaluan përkohësisht shërbimet për të lejuar punëtorët të votojnë, një veprim i paprecedentë që u vlerësua nga sindikatat dhe grupet për të drejtat e punëtorëve.
