Alarmet globale janë rritur pas ndalimit të eksportit nga Kina të mineraleve të rëndësishme, përfshirë aliazhët e tokave të rralla dhe magnetet, të cilat janë thelbësore për prodhimin e automjeteve elektrike, komponentëve të hapësirës ajrore, çipave dhe pajisjeve ushtarake. Këto kufizime, të vendosura në prill 2025, kanë çuar në ndërprerje të zinxhirëve të furnizimit dhe kanë nxitur paralajmërime nga prodhuesit e automjeteve në Gjermani, Indi dhe SHBA për mundësinë e pezullimit të prodhimit nëse çështja nuk zgjidhet shpejt, përcjell Reuters.
Kina, e cila dominon mbi 90% të përpunimit global të këtyre mineraleve, ka zbatuar këto kufizime si një lëvizje strategjike në kuadër të konfliktit të vazhdueshëm tregtar me Presidentin amerikan Donald Trump, i cili ka vendosur tarifa të larta ndaj mallrave kineze. Diplomatët dhe përfaqësuesit e industrisë nga vende si Japonia, India dhe shtetet evropiane po kërkojnë me ngulm negociata me Pekinin. Dërgesat mbeten të bllokuara në portet kineze, ndërkohë që qeveria zhvillon një kuadër të ri rregullator, i cili mund të ndërpresë përhershëm furnizimet për disa kompani të huaja.
Ekspertët e industrisë dhe ish-përfaqësuesit paralajmërojnë se kjo situatë nxjerr në pah dobësitë e SHBA-së në prodhimin e mineraleve të rëndësishme dhe theksojnë nevojën urgjente për zgjerimin e kapaciteteve vendore. Ky çështje pritet të jetë një temë kryesore në bisedimet e ardhshme midis Presidentëve Trump dhe Xi Jinping.
