Rusia dhe Ukraina thanë se kishin rënë dakord në bisedimet e paqes të hënën për të shkëmbyer më shumë robër lufte dhe për të kthyer trupat e 12,000 ushtarëve të vdekur.
Palët ndërluftuese u takuan për një orë në qytetin turk të Stambollit, për raundin e dytë të tillë të negociatave që nga marsi 2022, shkruan Reuters.
Presidenti turk, Erdogan, e përshkroi atë si një takim të shkëlqyer dhe tha se shpresonte të bashkonte presidentin rus Putin dhe atë ukrainas Zelensky, për një takim në Turqi me presidentin e SHBA-së, Donald Trump.
Por nuk pati asnjë përparim në një armëpushim të propozuar që Ukraina, aleatët e saj evropianë dhe Uashingtoni i kanë kërkuar Rusisë ta pranojë.
Moska thotë se kërkon një zgjidhje afatgjatë, jo një ndalesë në luftë; Kievi thotë se Putini nuk është i interesuar për paqe.
Ndihmësi i Kremlinit, Vladimir Medinsky, tha se negociatorët rusë u kishin dorëzuar homologëve të tyre ukrainas një memorandum të hollësishëm që përshkruante kushtet e Moskës për një armëpushim të plotë.
Medinsky, i cili kryeson ekipin rus, tha se Moska kishte sugjeruar gjithashtu një “armëpushim specifik prej dy deri në tre ditësh në seksione të caktuara të frontit” në mënyrë që trupat e ushtarëve të vdekur të mund të mblidheshin.
Secila palë tha se do t’i dorëzonte palës tjetër trupat e 6,000 ushtarëve të vdekur.
Përveç kësaj, ata thanë se do të kryenin një shkëmbim të mëtejshëm të madh të të burgosurve të luftës, pasi 1,000 robër nga secila palë u shkëmbyen pas një raundi të parë bisedimesh në Stamboll më 15 maj.
