Ukraina ka ndërmarrë një nga sulmet më të mëdha me dronë që nga fillimi i luftës, duke goditur mbi 40 avionë ushtarakë rusë në katër baza ajrore të ndryshme, tha një zyrtar i lartë i sigurisë për agjencinë Reuters.
Sipas të njëjtit burim, që foli në kushte anonimiteti, sulmet janë kryer nga Shërbimi i Sigurisë së Ukrainës (SBU) dhe kishin në shënjestër avionë strategjikë, përfshirë bombarduesit Tu-95 dhe Tu-22, të cilët Rusia i përdor për të lëshuar raketa me rreze të gjatë kundër territorit ukrainas.
Nëse konfirmohet, ky operacion do të përbënte goditjen më të rëndë që Ukraina i ka dhënë kapaciteteve ajrore të Rusisë deri më sot, duke shënuar një kthesë të rëndësishme në fushën e luftimeve.
Pamjet që iu dorëzuan Reuters tregojnë avionë të mëdhenj në flakë, përfshirë edhe ata që ngjajnë me bombarduesit strategjikë Tu-95.
Agjencia nuk ka mundur të verifikojë në mënyrë të pavarur përmbajtjen e këtyre videove apo deklaratat e burimit ukrainas.
Në mungesë të një arsenali të gjerë raketash, Ukraina ka zhvilluar një flotë të madhe dronësh sulmues që i ka përdorur gjithnjë e më shumë për të goditur objektiva ushtarake dhe infrastrukturën energjetike në thellësi të territorit rus.
Ndërkohë, Rusia ka propozuar një raund të ri bisedimesh në Stamboll të hënën, por pala ukrainase nuk ka konfirmuar ende pjesëmarrjen në këto negociata.
Ky zhvillim vjen në një moment kur tensionet mes dy vendeve mbeten të larta, dhe përpjekjet diplomatike për paqe janë ende të pasigurta.
