Mafia e Italisë po largohet nga luftërat e dhunshme në terren për të bashkëpunuar në trafikun e drogës, rrjetet e prostitucionit dhe pastrimin e parave, tha agjencia kombëtare antimafia (DIA) në një raport vjetor për grupet e krimit të organizuar të martën, shkuan Reuters.
Cosa Nostra e Siçilisë dhe Camorra rreth Napolit po krijojnë aleanca brenda dhe jashtë vendit, ndërsa Ndrangheta, me bazë në Kalabri, është gjithnjë e më shumë e përqendruar në kontrollin e projekteve të punëve publike, thuhet në raport.
“Bashkëjetesa ka nxitur sinergji që janë strukturuar në mënyrë progresive,” tha në një konferencë shtypi drejtori i DIA, Michele Carbone. Këto struktura janë bërë “të afta për të shmangur mbivendosjet, tensionet dhe fërkimet”, shtoi ai.
Punët publike të lidhura me Fondin e Rimëkëmbjes së Italisë nga BE-ja, planet për një urë të madhe që lidh Sicilinë me kontinentin dhe përgatitjet për Lojërat Olimpike Dimërore 2026 ishin të gjitha në rrezik të infiltrimit të mafias, thuhet në raportin e DIA-s.
Sektori i ndërtimit përfaqësonte 38% të masave administrative antimafia në vitin 2024, me hetime në 200 kantiere për projekte publike. Carbone tha se DIA ishte gati të bllokonte çdo përfshirje mafioze në urën për në Siçili.
“Së shpejti të gjitha aktivitetet parandaluese antimafia në lidhje me ndërtimin e urës mbi Ngushticën e Mesinës do fillojnë”, tha ai.
DIA theksoi gjithashtu ekspertizën teknologjike në rritje të mafias, duke përdorur kanale të koduara komunikimi dhe duke mbajtur kontakte me të burgosurit përmes dronëve.
Rrjetet “bankare të nëndheshme” kineze po përdoren gjithnjë e më shumë për pastrimin e parave, tha ai.
Në të njëjtën kohë, rekrutimi i të rinjve të margjinalizuar për të kryer krime në ato që quhen “bandat e fëmijëve ” lehtësohet nga shfaqjet spektakolare të pushtetit në mediat sociale, thuhet në raport.
