Koreja e Veriut ka arrestuar një zyrtar të katërt pas dështimit të lëshimit në det të një anijeje të re luftarake të marinës javën e kaluar , raportoi të hënën media shtetërore e Koresë së Veriut.
Aksidenti i së mërkurës shtypi pjesë të pjesës së poshtme të shkatërruesit të ri 5,000 tonësh.
Agjencia zyrtare Qendrore Koreane e Lajmeve (KCNA) raportoi të hënën se një person i katërt, Ri Hyong Son, zv/drejtor i departamentit të Industrisë së Municioneve të Komitetit Qendror të Partisë, ishte ndaluar.
Sipas KCNA-së, ai ishte “kryesisht përgjegjës për ndodhjen e aksidentit të rëndë”.
Ai është zyrtari më i lartë i ndaluar deri më tani në lidhje me incidentin.
Arrestimi i tij erdhi pasi tre zyrtarë të kantierit detar – kryeinxhinieri, kreu i punishtes së ndërtimit të trupit të anijes dhe zëvendësmenaxheri për çështjet administrative – u arrestuan të dielën, sipas KCNA.
Imazhet satelitore treguan shkatërruesin e dytë detar të njohur të Phenianit të shtrirë përmbys në ujë në portin verilindor të Chongjin të mbuluar me një mushama blu.
KCNA tha të hënën se “po kryhet në mënyrë aktive puna për rivendosjen e plotë të ekuilibrit të anijes luftarake”.
Kim dënon ‘pakujdesinë’ kriminale
Pheniani ka thënë se nuk janë shkaktuar dëme “serioze”. Të premten, Koreja e Veriut tha se do të duheshin 10 ditë që riparimet të përfundonin, por vëzhguesit në Korenë e Jugut thonë se mund të zgjasë shumë më tepër.
Incidenti është parë si një pengesë e turpshme për Korenë e Veriut dhe udhëheqësin e saj Kim Jong Un , i cili dëshiron të forcojë forcat detare të regjimit të izoluar për të kundërshtuar ndikimin e SHBA-së në rajon.
Kim ishte i pranishëm në ceremoninë e lançimit të mërkurën. Ai e ka quajtur incidentin një “akt kriminal të shkaktuar nga pakujdesia absolute, papërgjegjësia dhe empirizmi joshkencor”.
Shkatërruesi i parë i Koresë së Veriut u lëshua në det muajin e kaluar . Raportet e medias shtetërore thanë se është i aftë të mbajë një sërë armësh, duke përfshirë raketa bërthamore./DW
