Re të zeza tymi janë ngritur nga oxhaku mbi Kapelën Sistine, duke sinjalizuar se 133 kardinalët e mbyllur brenda nuk kanë arritur të zgjedhin një Papë të ri në ditën e parë të konklavës.
Pas procesionit zyrtar drejt Kapelës Sistine dhe betimit të secilit kardinal për ruajtjen e fshehtësisë, votimi nisi rreth orës 17:45 me orën lokale. Vëmendja ishte përqendruar tek oxhaku i famshëm, që për një pjesë të kohës u ruajt edhe nga një pulëbardhë.
Sipas The Guardian, pas një pritjeje të tensionuar, tymi i zi doli në orën 21:05, nën duartrokitjet e më shumë se 45,000 njerëzve të mbledhur në Sheshin Shën Pjetër.
Konklava do të vazhdojë të enjten dhe do të përfundojë vetëm kur të zgjidhet pasuesi i Papa Françeskut, i cili ndërroi jetë muajin e kaluar në moshën 88-vjeçare.
Edhe pse nuk pritej zgjedhja e Papës në ditën e parë, sheshi ishte plot me pelegrinë. Cinzia Caporali dhe bashkëshorti i saj nga Toskana kishin ardhur në Romë për të vizituar varrin e Papa Françeskut në bazilikën Santa Maria Maggiore.
Caporali kujtoi momentin kur Joseph Ratzinger (Papa Benedikti XVI) u zgjodh në prill 2005 – një nga zgjedhjet më të shpejta papnore në një shekull, që zgjati më pak se 36 orë. “Isha në një kafene aty pranë dhe njerëzit bërtisnin ‘Fatto, fatto, fatto!’ (Është bërë). Pastaj dola jashtë dhe pashë tymin e bardhë,” tha ajo.
Tani ajo është në pritje të Papës së ri. “Shpresoj të jetë një vazhdim i Françeskut. Ai ishte për njerëzit e margjinalizuar dhe kjo duhet të vazhdojë. Nuk duam më shkëlqimin e pasur të Kishës – kjo nuk është më në modë.”
Në meshën e mëngjesit të së mërkurës para konklavës, në Bazilikën e Shën Pjetrit, kardinali italian Giovanni Battista Re – i cili udhëhoqi edhe meshën e funeralit të Papa Françeskut – u kërkoi kardinalëve që të linin mënjanë interesat personale, duke theksuar se zgjedhja e një Pape të ri është “një akt me përgjegjësi maksimale”.
“Jemi këtu për të thirrur ndihmën e Shpirtit të Shenjtë, për të kërkuar dritën dhe forcën e Tij që Papa i zgjedhur të jetë ai që Kisha dhe njerëzimi kanë nevojë në këtë moment të vështirë dhe kompleks të historisë,” tha ai.
Ai gjithashtu i nxiti të udhëhiqeshin nga dashuria, sepse “dashuria është e vetmja forcë që mund të ndryshojë botën”.
