Kandidatja për deputete e Partisë Demokratike, Albana Vokshi, është paraqitur sot në ambientet e Prokurorisë së Posaçme (SPAK), ku ka depozituar informacion shtesë mbi denoncimet e mëparshme për krime zgjedhore.
Vokshi akuzoi Partinë Socialiste dhe kryeministrin Edi Rama për, siç u shpreh ajo, “keqpërdorim të përditshëm të administratës publike” në funksion të fushatës elektorale.
Ajo u bëri thirrje të gjithë nëpunësve civilë që të mos përfshihen në veprime të paligjshme dhe të distancohen nga praktikat e patronazhimit.
“Me keqpërdorimin e administratës publike, PS dhe Edi Rama vazhdojnë me shkelje të përditshme. I bëjmë thirrje çdo nëpunësi të administratës publike, çdo mësuesi, të mos bëhet pjesë e krimeve zgjedhore. Të largohen nga sistemi i patronazhimit”, deklaroi Vokshi.
Ajo theksoi se kushdo që shkel ligjin dhe përfshihet në krime zgjedhore – përmes patronazhimit apo dhënies së shërbimeve në këmbim të votës – do të përballet me drejtësinë.
“Çdokush që bën krime zgjedhore do të përballet me drejtësinë. Kushdo që bën detyrën e nëpunësit civil do të mbështetet nga qeveria e PD. Kush përfshihet në krime zgjedhore, do të mbajë përgjegjësi ligjore, herët a vonë”, tha ajo.
