Kandidati për deputet i PD-së për Tiranën, Klevis Balliu, ka intensifikuar takimet me qytetarët në kuadër të fushatës elektorale për zgjedhjet e 11 majit, duke theksuar mbështetjen në rritje që, sipas tij, dëshmon vullnetin e qytetarëve për ndryshim.
Gjatë këtyre takimeve, Balliu ka shprehur bindjen se qytetarët e Tiranës e kanë kuptuar qartë dështimin e qeverisë aktuale.
Ai akuzoi mazhorancën për mungesë të rritjes së pagave dhe pensioneve gjatë 12 viteve të fundit, ndërsa, sipas tij, të vetmet gjëra që janë rritur janë taksat.
“Tirana e ka kuptuar qartë që qeveria, e cila në 12 vite nuk rriti rroga e pensione, por rriti vetëm taksa, është qeveri e dështimit dhe e varfërimit të tyre,” – shkruan Balliu.
Balliu shprehet optimist se ndryshimi është i mundur dhe se me bashkëpunimin e qytetarëve, Shqipëria mund të rikthehet në normalitet.
