Numri i raportimeve për sulme seksuale në ushtrinë amerikane ra me gati 4% gjatë vitit të kaluar, i nxitur kryesisht nga një rënie e ndjeshme në Ushtrinë Tokësore – një kthesë pozitive pas më shumë se një dekade me rritje shqetësuese.
Të dhënat paraprake, të siguruara nga Associated Press përpara publikimit zyrtar të raportit nga Departamenti amerikan i Mbrojtjes, tregojnë se në vitin 2024 u raportuan 8,195 raste që përfshijnë anëtarë të ushtrisë amerikane, krahasuar me 8,515 raste të raportuara në vitin 2023.
Ky është viti i dytë radhazi me rënie të numrit të raportimeve, pas kulmit të shënuar në vitin 2022 me 8,942 raste.
Zyrtarët amerikanë të mbrojtjes thonë se ky trend është inkurajues, por theksojnë se numri i përgjithshëm i rasteve mbetet ende shumë i lartë dhe tregon për një problem të vazhdueshëm. Ata theksojnë gjithashtu se shumë viktima ende hezitojnë të denoncojnë përjetimet e tyre.
Ushtria Tokësore shënoi një rënie prej 13% të raportimeve, duke përbërë shumicën e ndryshimit pozitiv. Ndërkohë, Marina amerikane pa një rritje prej 4.3%, Forca Ajrore një rritje prej 2.2%, ndërsa në Trupat Detare pati rritje më të vogël se 1%.
Nga 8,195 rastet e raportuara, 512 përfshinin ushtarakë që thanë se kishin përjetuar sulm seksual përpara se të bashkoheshin me ushtrinë, ndërsa 641 raportime vinin nga civilë që pohuan se ishin sulmuar nga pjesëtarë të ushtrisë.
Ankesat për ngacmime seksuale u rritën lehtë, nga 2,980 në vitin 2023 në 3,014 në vitin 2024. Shumica e viktimave ishin gra ushtarake, ndërsa shumica dërrmuese e të akuzuarve ishin meshkuj.
Rënia vjen pas vënies në zbatim të një reforme madhore në sistemin e ndjekjes penale ushtarake, ku vendimet për ngritjen e akuzave për sulme seksuale nuk merren më nga komandantët ushtarakë, por nga juristë të pavarur. Ky ndryshim – një kërkesë e kahershme e Kongresit – hyri në fuqi vitin e kaluar dhe synon të rrisë besimin e viktimave tek drejtësia.
Zyrtarët thonë se është ende herët për të matur efektin e plotë të këtij ndryshimi në procedurat gjyqësore.
Megjithatë, rreth 75% e rasteve që shkuan në gjykatë përfunduan me dënime – një përqindje pak më e lartë se një vit më parë.
Pentagoni ka investuar mbi 1 miliard dollarë për të krijuar një fuqi punëtore parandaluese të përbërë nga rreth 2,500 profesionistë që do të vendosen në bazat ushtarake në të gjithë botën. Deri tani janë rekrutuar rreth 1,400 punonjës, por procesi është ngadalësuar këtë vit për shkak të shkurtimit të buxhetit dhe stafit nga administrata Trump.
Në mungesë të një raporti të plotë mbi përhapjen reale të sulmeve seksuale – që zakonisht matet me anketa konfidenciale çdo dy vjet – autoritetet i referohen të dhënave të vitit të kaluar, ku mbi 29,000 ushtarakë aktivë deklaruan se kishin përjetuar kontakt seksual të padëshiruar.
Ky ishte një ulje krahasuar me gati 36,000 raste të raportuara në sondazhin e vitit 2021 – duke shënuar kështu rënien e parë pas tetë vitesh rritjeje.
Megjithëse zyrtarët theksojnë se një rritje e raportimeve mund të tregojë rritje të besimit tek sistemi, ata e pranojnë se shumë viktima ende nuk raportojnë ngjarjet që përjetojnë.
