Duke hapur samitin në Londër, kryeministri britanik Keir Starmeri, shoqëruar nga presidenti francez Emmanuel Macron dhe presidenti ukrainas Volodymyr Zelensky nënvizoi pritjen e ngrohtë që Zelensky mori mbrëmjen e kaluar në Downing Street, ku një grup mbështetësish e përshëndetën me brohoritje në rrugë.
“Ne jemi të gjithë me ju, me Ukrainën, për aq kohë sa të jetë e nevojshme,” deklaroi Starmer, sipas The Guardian.
Megjithatë, ai paralajmëroi se “ky është një moment historik për sigurinë e Evropës,” duke shtuar se “arritja e një rezultati të mirë për Ukrainën nuk është thjesht një çështje e të drejtës apo gabimit; është thelbësore për sigurinë e çdo kombi të pranishëm këtu dhe për shumë të tjerë.”
Ai gjithashtu konfirmoi se kishte zhvilluar bisedime me vendet baltike, duke theksuar se ato janë “padyshim pjesë e diskutimit tonë.”
Starmer theksoi synimin e tij për të punuar në një plan për Ukrainën, të cilin më pas “do ta diskutojë me SHBA-në dhe do ta çojë përpara së bashku.”
Në samitin e sotëm, diskutimet do të përqendrohen te mënyrat për të “siguruar një paqe të drejtë dhe të qëndrueshme së bashku,” si dhe për të vazhduar mbështetjen ndaj Ukrainës “pasi, edhe pse Rusia flet për paqe, ajo po vazhdon agresionin e saj të pamëshirshëm.”
