Libani formoi një qeveri të re të shtunën, pas ndërhyrjes jashtëzakonisht të drejtpërdrejtë të SHBA-së në proces në një hap që synon ta sjellë vendin më afër fondeve të rindërtimit pas një lufte shkatërruese midis Izraelit dhe Hezbollahut.
Duke folur për gazetarët në pallatin presidencial, kryeministri i ri Naëaf Salam tha se kabineti 24 anëtarësh do t’i jepte përparësi reformave financiare, rindërtimit dhe zbatimit të një rezolute të Kombeve të Bashkuara që shihet si një gur themeli për stabilitetin në kufirin libanez me Izraelin.
Njoftimi erdhi pas më shumë se tre javësh bisedimesh me partitë politike rivale në Liban – ku postet qeveritare janë të ndara sipas sekteve – dhe debateve mbi ministrat shiitë, të emëruar zakonisht nga Hezbollahu që mbështetet nga Irani dhe aleati i tij shiit Amal.
Por Uashingtoni ka këmbëngulur kundër ndikimit të Hezbollahut në çdo qeveri të re.
Zëvendës i dërguari i SHBA-së për Lindjen e Mesme Morgan Ortagus tha të premten se SHBA-të e konsideronin përfshirjen e Hezbollahut në kabinetin e ri një “vijë të kuqe” dhe falënderuan Izraelin për goditjen shkatërruese ndaj grupit, në një deklaratë të diskutueshme që ndezi protesta në Liban.
Por në fund, aleatja e Hezbollahut, Amal – e cila drejtohet nga kryetari i parlamentit Nabih Berri – u lejua të zgjidhte katër nga anëtarët e kabinetit të ri, duke përfshirë ministrin e Financave Yassin Jaber si dhe t’i jepte miratimin e tij një të pesti.
Presidenti libanez Joseph Aoun, i cili gëzonte mbështetjen e SHBA si komandant i ushtrisë, u zgjodh president më 9 janar dhe emëroi Salam për të formuar një qeveri të re disa ditë më vonë. Salam kishte shërbyer si kreu i Gjykatës Ndërkombëtare të Drejtësisë.
Emërimi i Salam ishte sinjali i fundit i një ndryshimi dramatik në ekuilibrin e pushtetit në Liban, pas goditjeve të rënda që Izraeli i dha Hezbollahut, rrëzimit në dhjetor të aleatit sirian të Hezbollahut, Bashar al-Assad dhe zgjedhjes së Aoun muajin e kaluar.
