Policia ka liruar hapësirën e plazheve në Durrës e Sarandë.
Në kuadër të operacionit “Plazh i lirë”, policia ka sekuestruar 106 shezlongë dhe 123 çadra në Sarandë e Durrës, që ishin vendosur në mënyrë të paligjshme.
Ndërkohë, janë vënë nën hetim 2 administratorët që nuk deklaronin të ardhurat që gjeneronin nga ky aktivitet.
Konkretisht, në plazhin “Apollonia”, në Durrës, u sekuestruan 106 shezlongë dhe 53 çadra që ishin vënë pa autorizim. Për këtë rast, është vënë në hetim 31-vjeçari M.M., banues në Durrës.
Në plazhin e Çentralit, në Sarandë, u sekuestruan 70 çadra që ishin vënë pa autorizim. Për këtë rast, nisi hetimi për shtetasin J. Ç., 24 vjeç , banues në Sarandë.
Dy administratorët akuzohen për veprat penale “Pushtimi i tokës” dhe “Fshehja e të ardhurave”.
Kontrollet dhe verifikimet në kuadër të operacionit “Plazh i lirë”, vijojnë.