CIA paralajmëroi Berlinin për një sulm të mundshëm në tubacionet e gazit në Detin Baltik ‘javë më parë’, raportoi të martën revista gjermane ‘Der Spiegel’.
Gjermania po kërkonte përgjigje pasi të dy tubacionet e Rusisë, Nord Stream u dëmtuan dhe u shfaq një rrjedhje masive gazi në ishullin danez të Bornholm.
Një informatë nga agjencia amerikane e spiunazhit është ‘marrë në Berlin gjatë verës’, tha gazeta, duke cituar ‘disa njerëz të njohur me këtë çështje’. Zyrtarisht, megjithatë, qeveria federale nuk pranoi të komentojë mbi çështjet e lidhura me inteligjencën.
Shërbimet gjermane të sigurisë janë aktualisht duke ekzaminuar pamjet satelitore të zonës ku ndodhën shpërthimet, sipas Spiegel. Ata janë gjithashtu të bindur se vetëm një aktor shtetëror mund ta kishte bërë këtë, duke sugjeruar se ‘zhytësit ose një mini-nëndetëse’ mund të kishin vendosur mina ose eksplozivë në tubacion.
Nord Stream 1 dhe Nord Stream 2 humbën papritur presionin të hënën. Autoritetet daneze raportuan një rrjedhje gazi në Bornholm, ndërsa sizmologët suedezë regjistruan shpërthime të shumta. Operatori i tubacionit pohoi se linjat e shumta të gazit pësuan dëme ‘të papara’ dhe ishte e pamundur të vlerësohej se kur ose nëse shërbimi mund të rikthehej.
Deri të hënën në mbrëmje, qeveria gjermane ishte e bindur se tubacioni ishte në shënjestër të një sulmi të qëllimshëm, sipas të përditshmes Tagesspiegel. Berlini po shqyrton mundësinë që Ukraina ose ‘forcat e lidhura me Ukrainën’ mund të qëndronin pas tij, por gjithashtu një ‘operacion’ nga Rusia është i mundur me qëllimin për ta bërë Ukrainën të duket keq dhe për të rritur çmimet e energjisë në BE.
Ndërsa pranoi se ‘ndërprerja e përhershme e furnizimeve me gaz nga Rusia’ do të ishte në interesin e Ukrainës, Der Spiegel tha se një sulm i tillë do të kishte ‘disvantazhe të mëdha politike’ për Kievin. Motivi i vetëm për Moskën për të hedhur në erë tubacionin, sipas revistës, do të ishte ‘fajësimi i palëve të tjera për incidentin’.
Presidentja e Komisionit të BE-së Ursula von der Leyen ka bërë thirrje për një hetim për të pasur ‘qartësi të plotë’ mbi atë që ndodhi me gazsjellësin.
“Çdo ndërprerje e qëllimshme e infrastrukturës aktive evropiane të energjisë është e papranueshme dhe do të çojë në përgjigjen më të fortë të mundshme.” – shkroi ajo në Tëitter.
Më herët të martën, Sekretari amerikan i Shtetit, Antony Blinken tha se një sulm në Nord Stream nuk ishte ‘në interesin e askujt’, por se ai gjithashtu përfaqësonte një ‘mundësi të rëndësishme’ për Evropën që të braktiste gazin natyror rus në favor të furnizimeve alternative të energjisë dhe ‘të përshpejtojë tranzicionin drejt burimeve të rinovueshme’ për të luftuar ndryshimet klimatike.
