Më shumë se gjysma e të anketuarve në një sondazh të ri kanë thënë se e shohin FBI-në si ‘Gestapo-n personale’ të presidentit amerikan Joe Biden, duke pasqyruar pikëpamje gjithnjë e më të polarizuara në lidhje me ndjekjen e ish-presidentit Donald Trump nga agjencia federale e policisë.
Një sondazh i Rasmussen tregoi një ndarje të thellë në qëndrimet e amerikanëve ndaj FBI-së, me 44% të të anketuarve që thanë se bastisja e fundit në shtëpinë e Trump në Florida i bëri ata të humbnin besimin te FBI-ja. Megjithatë, një pjesë e konsiderueshme e 29% thanë se ky veprim vetëm rriti besimin e tyre te ajo, ndërsa 23% thanë se nuk kishte asnjë ndryshim.
Sipas zyrtarëve, bastisja federale në shtëpinë e Trump në Florida më 8 gusht u përqendrua në një hetim mbi dokumentet e klasifikuara që supozohet se janë marrë nga Shtëpia e Bardhë, disa prej tyre thuhet se janë top-sekret dhe madje potencialisht të lidhura me armët bërthamore, me FBI-në që shpreson të rikuperojë 11 grupe të ndryshme materialesh nga banesa.
Mbetet e paqartë se çfarë u gjet në bastisje burime të paidentifikuara të cituara nga NBC kohët e fundit thanë se agjentëve do t’u duhet kohë për të analizuar dosjet e sekuestruara.
Trump, nga ana e tij, ka akuzuar FBI-në për një bastisje të politizuar dhe pretendoi se agjencia i ‘vodhi’ pasaportat dhe dokumentet ligjore të privilegjuara. Avokatët e ish-presidentit nuk u lejuan të vëzhgonin kontrollin e pronës së tij dhe thanë se agjentët e FBI-së i urdhëruan ata të mbyllnin kamerat e sigurisë gjatë kohës që po kryhej.
