Kreu i BDI-së, Ali Ahmeti është ftuar nga Dhomat Speciale të Hagës në cilësinë e dëshmitarit.
Lajmin e ka konfirmuar vet kreu i BDI-së nëpërmjet një postimi në rrjetet sociale ku shkruan se ka pranuar ftesën.
Ahmeti ndër të tjera thekson se sundimi i ligjit dhe arritja e drejtësisë së mirëfilltë joselektive janë synim dhe detyrimi i tij i përhershëm.
“Të nderuar qytetarë,
Sundimi i ligjit dhe arritja e drejtësisë së mirëfilltë joselektive, vendore dhe ndërkombëtare, janë synim dhe detyrim i imi i përhershëm në të gjithë veprimtarinë time.
Andaj, ju njoftoj që Dhomat e specializuara të Republikës së Kosovës, gjegjësisht prokuroria speciale e Kosovës, si një nga themeluesit e UÇK dhe anëtar i shtabit të përgjithshëm, më ka ftuar në cilësinë e dëshmitarit dhe pa hamendje kam pranuar ftesën si dhe kam vendosur kontakt konstruktiv dhe bashkëpunues me zyrtarët në Hagë.
Gjithmonë kam qenë ithtar i drejtësisë joselektive dhe jam në dispozicion të tërësishëm të organeve të drejtësisë për ta dëshmuar çiltërsinë e luftës çlirimtare të popullit shqiptar përballë gjenocidit të regjimit serb të Millosheviçit”-shkruan Ahmeti.
Thirrja e Ahmetit vjen vetëm pak ditë pasi Presidenti i Kosovës Hashim Thaç kaloi javën e kaluar ditë marrje në pyetje nga prokurorët në Hagë.
Madje thirrja në Hagë e Thaçit anuloi edhe takimin në Uashington mes Kosovës dhe Serbisë për dialogun bilateral nën ndërmjetësimin e Shtëpisë së Bardhë.
