Komisioni i Pavarur i Kualifikimit ka shkarkuar nga detyra gjyqtarin e Apelit të Tiranës, Andi Civicin.
Këtë të hënë ai u ballafaqua me probleme në justifikimin e pasurisë, e KPK e përfundoi hetimin administrativ vetëm për këtë kriter.
Trupa gjykuese drejtohej nga Roland Ilia, me relatore Valbona Sanxhaktari dhe anëtare Xhensila Pine, ndërsa në cilësinë e vëzhguesit ndërkombëtar ishte i pranishëm Theo Jacobs.
Në nisje të relatimit, Valbona Sanxhaktari tha se Inspektoriati i Lartë i Deklarimit dhe Kontrollit të Pasurive kishte konstatuar deklarim të pasaktë dhe mungesë të burimeve të ligjshme për gjyqtarin Andi Civici.
Problem për Civicin u bënë huatë e marra nga vjehrri dhe daja i bashkëshortes për blerjen e një apartamenti.
