Gjykata Administrative e Apelit ka rrëzuar padinë e prokurorit Lulzim Alushaj, i cili u skualifikua më herët nga gara për Kryeprokuror nga Këshilli i Lartë i Prokurorisë.
Pas këtij vendimi zhbllokohen procedurat për përzgjedhjen e kandidatëve për Kryeprokuror. Alushaj është shprehur pas këtij vendimi: “Jam kurioz për argumentet e rrëzimit të padisë. Vendimmarrja e KLP-s ishte e cunguar dhe jo ligjore”.
Prokurori Alushaj pretendon se KLP-ja ka shkelur ligjin pasi ka mbajtur dy standarde.
“Më 17 qershor kur u mbyll gara për Prokuror të përgjithshëm, duhet të ishte skualifikuar edhe kandidati tjetër Olsian Çela i cili s’kishte kaluar vettingun”, ka thënë ai.
Ai i kërkoi trupës gjykuese të kryesuar nga Kastriot Selita që ta quante të paligjshme garën për Prokuror të Përgjithshëm.
Alushaj u skualifikua nga Këshilli i Lartë i Prokurorisë, me argumentimin se nuk e plotësonte kushtin që të kishte 15 vjet përvojë pune si jurist i spikatur. Tashmë kandidatët për postin e Kryeprokurorit janë prokurori i Krimeve të Rënda, Olsjan Çela, prokurorja e Apelit të Tiranës, Fatjona Memçaj, si dhe Kryeprokurorja e Përkohshme Arta Marku.
