Presidenti i Shteteve të Bashkuara, Donald Trump, deklaroi se sulmet amerikane ndaj Iranit kanë eliminuar një kërcënim të madh, ndërsa theksoi se operacioni ushtarak nuk ka përfunduar ende, përcjell Fox News.
Duke folur në darkën vjetore të National Republican Congressional Committee në Uashington, Trump u shpreh se ndërhyrja ishte e domosdoshme pas dekadash mosveprimi.
“Nuk kishim zgjidhje tjetër, por mendoja se do të ishte shumë më keq. Prisja që çmimet e energjisë dhe naftës të rriteshin më shumë dhe që tregjet financiare të binin,” tha ai.
Sipas presidentit, pasojat ekonomike që ai kishte parashikuar nuk u materializuan, por kjo nuk ndikoi në vendimin për të ndërmarrë veprimin ushtarak.
“Nuk kishte rëndësi për mua. Është afatshkurtër. Ajo që duhej të bënim ishte të hiqnim kancerin. Duhej ta prisnim kancerin. Kanceri ishte Irani me armë bërthamore. E kemi hequr. Tani do ta përfundojmë,” u shpreh Trump.
Deklaratat e tij vijnë në një kohë kur tensionet mes Shteteve të Bashkuara dhe Iranit mbeten të larta, ndërsa komuniteti ndërkombëtar ndjek me shqetësim zhvillimet në rajon.
