NASA po anulon planet për të vendosur një stacion hapësinor në orbitën e Hënës dhe, në vend të tij, do të përdorë komponentët e tij për të ndërtuar një bazë prej 20 miliardë dollarësh në sipërfaqen e Hënës gjatë shtatë viteve të ardhshme, tha të martën drejtuesi i ri i agjencisë, Jared Isaacman.
Isaacman, i cili u betua në detyrë në agjenci në dhjetor, e bëri njoftimin gjatë hapjes së një aktiviteti njëditor në selinë e NASA-s në Uashington, ku ai paraqiti një sërë ndryshimesh që po bën në programin kryesor hënor të agjencisë, Artemis.
“Nuk duhet të habitet askush që po e vendosim në pauzë Gateway në formën e tij aktuale dhe po përqendrohemi te infrastruktura që mbështet operacionet e qëndrueshme në sipërfaqen e Hënës,” u tha Isaacman pjesëmarrësve në aktivitet.
Stacioni Lunar Gateway, i ndërtuar në masë të madhe tashmë nga kontraktorët Northrop Grumman dhe Lanteris Space Systems, në pronësi të Intuitive Machines, ishte menduar të ishte një stacion hapësinor i vendosur në orbitë rreth Hënës. Përshtatja e këtij projekti për ta kthyer në një bazë në sipërfaqen e Hënës nuk është e thjeshtë.
“Pavarësisht disa sfidave shumë reale që lidhen me pajisjet dhe afatet, ne mund të ripërdorim pajisjet dhe angazhimet e partnerëve ndërkombëtarë për të mbështetur objektivat në sipërfaqe dhe qëllime të tjera të programit,” tha Isaacman.
Lunar Gateway ishte projektuar të shërbente si një platformë kërkimore dhe njëkohësisht si një stacion transferimi, ku astronautët do të hipnin në mjetet e zbritjes në Hënë përpara se të zbrisnin në sipërfaqen hënore, shkruan Reuters.
Ndryshimet e vendosura nga Isaacman në javët e fundit në programin kryesor amerikan për Hënën po riformësojnë kontrata me vlerë miliarda dollarë brenda përpjekjes Artemis.
Kjo po i detyron kompanitë të reagojnë me shpejtësi për t’iu përshtatur urgjencës shtesë, ndërkohë që Kina po bën përparime drejt uljes së saj në Hënë deri në vitin 2030.
